پاکستان کی ڈیجیٹل معیشت میں تاریخی پیش رفت، عالمی شراکت داری کا نیا باب کھل گیا

اسلام آباد: پاکستان میں کرپٹو کرنسی اور ڈیجیٹل اثاثہ جات کے فروغ کے لیے اہم اقدامات کیے گئے ہیں، جن میں پاکستان کرپٹو کونسل اور پاکستان ورچوئل اثاثہ جات ریگولیٹری اتھارٹی کا قیام شامل ہے۔ ان اداروں کا مقصد کرپٹو مارکیٹ کی ریگولیشن، صارفین کے تحفظ کو یقینی بنانا اور ملک میں ڈیجیٹل اثاثوں کے لیے قانونی فریم ورک فراہم کرنا ہے۔

پاکستان میں اہم ایکسچینجز کے لیے عبوری لائسنس جاری کیے گئے ہیں جبکہ مائننگ، ٹوکنائزیشن اور فنٹیک کے پائلٹ پروجیکٹس بھی شروع کیے گئے ہیں تاکہ ڈیجیٹل معیشت کو فروغ دیا جا سکے۔

وزیراعظم پاکستان نے ورلڈ لبرٹی فنانشل کے وفد سے ملاقات کی جس میں ڈیجیٹل ادائیگیوں میں تعاون اور مفاہمتی یادداشت پر دستخط کیے گئے۔ اس ملاقات میں امریکی وفد کے چیف ایگزیکٹو آفیسر زچری وٹکوف، اعلیٰ عسکری قیادت اور اہم حکومتی نمائندگان بھی موجود تھے۔

وزیراعظم پاکستان نے کہا کہ ڈیجیٹل پاکستان کا وژن شہریوں کے لیے بہتر روابط، آسان رسائی اور شفافیت پر مبنی ہے۔ ورلڈ لبرٹی فنانشل نے پاکستان میں محفوظ اور شفاف ڈیجیٹل ادائیگی نظام پر تعاون میں گہری دلچسپی ظاہر کی۔ اس تعاون سے عالمی مالیاتی تبادلے اور زرمبادلہ کی ادائیگیوں میں جدت آئے گی اور ڈیجیٹل فنانس میں نئے افق روشن ہوں گے۔

زچری وِٹکوف نے پاکستان کے پالیسی فریم ورک کو سراہا اور کہا کہ عالمی ڈیجیٹل معیشت میں پاکستان کا کردار نہایت اہم ہے۔ یاد رہے کہ گزشتہ سال ورلڈ لبرٹی فنانشل نے پاکستان کرپٹو کونسل کے ساتھ لیٹر آف انٹینٹ پر بھی دستخط کیے تھے، جس کا مقصد بلاک چین، اسٹیبل کوائنز اور دیگر ڈیجیٹل فنانس کے شعبوں میں تعاون کو فروغ دینا تھا۔

یہ ملاقات پاکستان کے ابھرتے ہوئے ڈیجیٹل اثاثہ جات کے فریم ورک پر بڑھتی ہوئی بین الاقوامی توجہ کی عکاسی کرتی ہے، اور حکومتی وژن و ریگولیٹری پیش رفت پاکستان کی بٹ کوائن اور ڈیجیٹل معیشت کو ترقی کی نئی سمت دے رہی ہیں۔