دنیا میں پہلی سونے کی سڑک کب اور کس ملک میں بنائی جا رہی ہے؟ اہم اعلان ہو گیا

دبئی میں سونے کی تجارت سے وابستہ ایک بڑا اور منفرد منصوبہ باضابطہ طور پر شروع کر دیا گیا ہے۔

 حکومت نے نئے گولڈ ڈسٹرکٹ کا افتتاح کرتے ہوئے دنیا کی پہلی گولڈ اسٹریٹ بنانے کا اعلان بھی کیا ہے۔ یہ منصوبہ دبئی کو عالمی سطح پر سونے کی تجارت کا بڑا مرکز بنانے میں اہم کردار ادا کرے گا۔

حکام کے مطابق یہ گولڈ اسٹریٹ دبئی کے ایک جدید اور بین الاقوامی معیار کے تجارتی و سیاحتی مقام کے طور پر سامنے آئے گی۔ یہاں دنیا بھر سے سیاح، سرمایہ کار اور تاجر آئیں گے۔ اس منصوبے کے تحت جدید سہولیات سے آراستہ ایک بڑا تجارتی مرکز قائم کیا جائے گا، جہاں ایک ہزار سے زائد گولڈ ریٹیلرز کو کاروبار کی سہولت دی جائے گی۔

دبئی حکومت کا کہنا ہے کہ اس منصوبے کے ڈیزائن، تعمیر اور دیگر مراحل سے متعلق تفصیلات مرحلہ وار جاری کی جائیں گی۔ گولڈ ڈسٹرکٹ میں ریٹیل، ہول سیل اور سرمایہ کاری کے تمام شعبے ایک ہی جگہ موجود ہوں گے۔ اس کے ساتھ ساتھ سونے اور زیورات کی مکمل ویلیو چین کو بھی ایک ہی چھت تلے جمع کیا جائے گا۔

حکام نے کہا کہ سونا دبئی کی پہچان اور صدیوں پر محیط تجارتی تاریخ کا اہم حصہ ہے۔ نیا منصوبہ اس روایت کو مزید مضبوط کرے گا اور عالمی سطح پر دبئی کی شناخت کو مزید نمایاں بنائے گا۔ اس اقدام سے نہ صرف سرمایہ کاری میں اضافہ ہوگا بلکہ روزگار کے نئے مواقع بھی پیدا ہوں گے۔