آن لائن ٹیکسی چلانے والے افراد خبردار!!! بڑا فیصلہ ہوگیا

اسلام آباد کی ضلعی انتظامیہ نے شہر میں چلنے والی تمام آن لائن ٹیکسی اور موٹر بائیک سروسز کی باقاعدہ رجسٹریشن کا فیصلہ کر لیا ہے۔ اس اقدام کا مقصد شہریوں کی سیکیورٹی کو بہتر بنانا اور ٹرانسپورٹ کے نظام کو منظم کرنا ہے۔

ضلعی انتظامیہ کے مطابق آئندہ بغیر رجسٹریشن ٹیکسی یا بائیکیا سروس چلانے والوں کے خلاف سخت کارروائی کی جائے گی۔ اس حوالے سے ڈپٹی کمشنر اسلام آباد کی ہدایت پر کل سے رجسٹریشن کا باقاعدہ عمل شروع کیا جا رہا ہے۔

انتظامیہ نے واضح کیا ہے کہ رجسٹریشن کے دوران تمام ڈرائیورز اور گاڑیوں کا مکمل ریکارڈ جمع کیا جائے گا۔ اس میں ڈرائیور کی ذاتی معلومات، گاڑی کی تفصیلات اور سروس فراہم کرنے والی کمپنی کا ڈیٹا شامل ہو گا۔ اس مقصد کے لیے ایڈیشنل ڈپٹی کمشنر ایسٹ کو تمام آن لائن ٹیکسی سروسز کے سی ای اوز سے رابطہ کرنے کی ہدایات جاری کر دی گئی ہیں۔

غیر رجسٹرڈ گاڑیوں اور بائیکیا سروسز کی رجسٹریشن ڈیجیٹل آٹومیشن کے ذریعے کی جائے گی۔ اس کے لیے ایک خصوصی رجسٹریشن ایپ استعمال کی جائے گی، جس تک اسلام آباد پولیس کو بھی مکمل رسائی حاصل ہو گی تاکہ کسی بھی ناخوشگوار واقعے کی صورت میں فوری کارروائی ممکن ہو سکے۔

رجسٹریشن مکمل ہونے کے بعد ڈرائیورز کے لیے لازم ہو گا کہ وہ ہر مسافر کی تفصیلات ایپ میں درج کریں۔ انتظامیہ کے مطابق مسافر کا شناختی کارڈ نمبر درج کیے بغیر کسی بھی ڈرائیور کو سواری لے جانے کی اجازت نہیں دی جائے گی۔

ضلعی انتظامیہ کا کہنا ہے کہ یہ اقدام شہریوں کے تحفظ، جرائم کی روک تھام اور آن لائن ٹرانسپورٹ سروسز میں شفافیت لانے کے لیے اٹھایا گیا ہے۔ عوام سے بھی اپیل کی گئی ہے کہ وہ صرف رجسٹرڈ سروسز کا استعمال کریں۔