جنوبی لبنان پر اسرائیلی فضائی حملوں کی نئی لہر، متعدد علاقے نشانہ

جنوبی لبنان میں اسرائیلی افواج نے متعدد فضائی حملے کرتے ہوئے مختلف علاقوں کو نشانہ بنایا ہے۔ یہ کارروائیاں ایک پیشگی انتباہی بیان کے بعد کی گئیں، جس میں پہلی بار آئندہ حملوں کا باقاعدہ اعلان کیا گیا تھا۔

اسرائیلی فوج کی جانب سے جاری بیان میں دعویٰ کیا گیا کہ حملوں کا ہدف لبنانی مزاحمتی تنظیم کے اسلحہ کے ذخائر اور متعلقہ تنصیبات تھیں۔ بیان کے فوراً بعد جنوبی لبنان کے مختلف مقامات پر فضائی کارروائیاں شروع ہو گئیں، جن سے علاقے میں خوف و ہراس پھیل گیا۔

یہ بھی پڑھیں : لبنانی وزیر صنعت کا حزب اللہ پر عدم تعاون کا الزام، اسلحہ حوالے کرنے پر زور

مقامی ذرائع کے مطابق انصار اور تبنا کے قصبے، الریحان کی پہاڑیاں، اقلیم التفاح اور البیصاریہ کے علاقے ان حملوں کی زد میں آئے۔ عینی شاہدین نے بتایا کہ متعدد زور دار دھماکوں کی آوازیں سنائی دیں اور فضا میں دھوئیں کے بادل دیکھے گئے۔ تاہم فوری طور پر جانی نقصان یا مالی خسارے کی تفصیلات سامنے نہیں آ سکیں۔

لبنان کے جنوبی علاقوں میں اس تازہ فضائی کارروائی نے پہلے سے موجود کشیدگی میں مزید اضافہ کر دیا ہے۔ مقامی آبادی میں شدید بے چینی پائی جا رہی ہے جبکہ امدادی ادارے ممکنہ نقصانات کا جائزہ لینے میں مصروف ہیں۔