پولینڈ: اسرائیلی جاسوسی سافٹ ویئر کا استعمال، سابق انٹیلی جنس سربراہان پر فردِ جرم عائد

پولینڈ کے استغاثہ نے اسرائیلی ساختہ پیگاسس جاسوسی سافٹ ویئر کے مبینہ غیر مجاز استعمال پر دو سابق انٹیلی جنس سربراہان کے خلاف فوجداری الزامات عائد کر دیئے ہیں۔

پولینڈ کے قومی استغاثہ دفتر نے اعلان کیا ہے کہ داخلی سلامتی ایجنسی کے سابق سربراہ پیوٹر پی اور عسکری انسدادِ جاسوسی سروس کے سربراہ میچیئ ماتیرکا کے خلاف پیگاسس جاسوسی سافٹ ویئر کے استعمال پر فوجداری الزامات عائد کیے گئے ہیں۔

استغاثہ نے نجی معلومات کے تحفظ کے قانون کے تحت مکمل نام جاری نہیں کیے، تاہم میچیئ ماتیرکا نے سماجی رابطے کی ویب سائٹ پر خود کو نامزد کرتے ہوئے کارروائی کی مذمت کی۔

استغاثہ کے مطابق ان عہدیداروں کے پاس سافٹ ویئر کے لیے مطلوبہ منظوری نہیں تھی اور انہیں معلوم تھا کہ اس کے استعمال سے خفیہ یا انتہائی خفیہ معلومات کو خطرہ لاحق ہو سکتا ہے۔

دونوں پر سرکاری فرائض کی ادائیگی میں کوتاہی کا الزام ہے اور انہیں تین سال تک قید کی سزا ہو سکتی ہے۔ تفتیش کے دوران دونوں نے الزامات کی تردید کی اور وضاحت دینے سے انکار کیا۔

یہ بھی پڑھیں : مودی کا اسرائیلی پارلیمان سے خطاب، اسرائیل کی حمایت کا اعلان، غزہ نسل کشی پر خاموشی

پیگاسس ایک جدید نگرانی اور ہیکنگ نظام ہے، جسے اسرائیلی کمپنی این ایس او گروپ نے تیار کیا اور اسے غیر ملکی حکومتی اداروں کو لائسنس کیا جاتا ہے۔

یہ نظام ہدف کے موبائل فون میں خفیہ طور پر داخل ہو کر تصاویر، پیغامات، پاس ورڈز، کال ریکارڈ، مقام کی معلومات اور کیمرہ و مائیک تک رسائی حاصل کر سکتا ہے۔ دنیا بھر میں صحافیوں اور کارکنوں کے خلاف اس کے استعمال کے الزامات عائد کیے گئے ہیں۔

پولینڈ کے سابق وزیر انصاف اور اٹارنی جنرل زبیگنیف زیوبرو بھی اختیارات کے ناجائز استعمال سمیت دیگر الزامات کا سامنا کر رہے ہیں۔

ان پر الزام ہے کہ انہوں نے جرائم کے متاثرین کے لیے مختص فنڈز کو پیگاسس خریدنے کے لیے استعمال کیا اور سیاسی مخالفین کی نگرانی کی۔ یہ معاملہ پولینڈ کی سیاست میں شدید بحث اور قانونی کشمکش کا سبب بن چکا ہے۔