امریکی شہریوں کی اکثریت ایران پر حملے کی مخالف : سروے رپورٹ

ایک حالیہ سروے کے مطابق امریکا میں ایران پر حملوں کی حمایت محدود ہے اور صرف ایک چوتھائی افراد ان کارروائیوں کے حق میں ہیں، جبکہ بڑی تعداد مخالفت یا غیر یقینی کا اظہار کر رہی ہے۔

خبر رساں ادارے رائٹرز اور ادارہ ابسوس کے مشترکہ سروے میں انکشاف ہوا ہے کہ امریکا اور اسرائیل کی جانب سے ایران پر کیے گئے حملوں کو امریکی عوام کی محدود حمایت حاصل ہے۔

سروے ہفتے اور اتوار کو کیا گیا اور نتائج کے مطابق صرف پچیس فیصد افراد نے حملوں کی حمایت کی۔ تینتالیس فیصد نے مخالفت کی جبکہ انتیس فیصد غیر یقینی کا شکار تھے۔

یہ بھی پڑھیں : ایران کی نئی قیادت مذاکرات چاہتی ہے، میں نے ہامی بھر لی : امریکی صدر

جمہوری جماعت کے حامیوں میں چوہتر فیصد نے حملوں کی مخالفت کی جبکہ سات فیصد نے حمایت کی۔ ریپبلکن جماعت کے حامیوں میں پچپن فیصد نے حمایت کی مگر بیالیس فیصد نے کہا کہ اگر اس جنگ کے نتیجے میں مشرق وسطیٰ میں امریکی فوجی ہلاک یا زخمی ہوتے ہیں تو وہ حمایت کم کر دیں گے۔

پینتالیس فیصد افراد نے کہا کہ اگر امریکا میں پیٹرول یا تیل کی قیمتیں بڑھتی ہیں تو وہ اس جنگ کی حمایت کم کر دیں گے۔ ماہرین کا کہنا ہے کہ یہ نتائج آئندہ وسط مدتی انتخابات سے قبل صدر ڈونلڈ ٹرمپ کی پالیسیوں پر اثر انداز ہو سکتے ہیں۔