جب تک اہداف حاصل نہیں ہوتے جنگ سے پیچھے نہیں ہٹیں گے، ایرانی جنرل کا اعلان

ایران کے سینیئر فوجی جنرل نے عزم ظاہر کیا ہے کہ ایران اس وقت تک جنگ سے پیچھے نہیں ہٹے گا، جب تک وہ اپنے تمام مقاصد حاصل نہیں کر لیتا۔

جنرل کیومرث حیدری نے امریکہ کے خلاف جاری کشیدگی پر سخت ردعمل دیتے ہوئے کہا ہے کہ ایران اس جنگ ادھوری نہیں چھوڑے گا۔

انہوں نے عہد کیا کہ جب تک ایران اپنے تمام تزویراتی مقاصد حاصل نہیں کر لیتا اور امریکہ کو کاری ضربیں نہیں لگا دیتا، یہ سلسلہ جاری رہے گا۔

یہ بھی پڑھیں : ایران کا امریکہ اور اسرائیل پر حملوں کی انیسویں لہر کا آغاز، چالیس سے زائد میزائل داغ دیئے

ایرانی نیم سرکاری خبر رساں ایجنسی کے مطابق، خاتم الانبیاء مرکزی ہیڈ کوارٹر کے نائب کمانڈر جنرل حیدری نے واضح کیا کہ ایران کے لیے اس بات کی کوئی اہمیت نہیں کہ یہ جنگ کتنے دن یا کتنے ماہ چلے گی۔

ان کا کہنا تھا کہ ایرانی قوم آٹھ سالہ جنگ کا تجربہ رکھتی ہے اور وہ ایک بار پھر ثابت کریں گے کہ وہ اپنے دفاع کے لیے کسی بھی حد تک جا سکتے ہیں۔

جنرل حیدری نے مزید کہا کہ ہم اس جنگ کا اختتام صرف اسی صورت میں کریں گے، جب دشمن کو اپنے شرمناک اقدامات پر مایوسی اور پچھتاوا ہو گا۔ ایران اپنی خود مختاری پر کوئی سمجھوتہ نہیں کرے گا اور امریکہ کو اس کی جارحیت کا بھرپور جواب دیا جائے گا۔