ایران کی تمام صلاحیتیں ختم کردیں، مجتبیٰ خامنہ ای کا سپریم لیڈر بننا قبول نہیں، صدر ٹرمپ

امریکی صدر ڈونلڈ ٹرمپ نے ایک انٹرویو کے دوران ایران کے مستقبل کے حوالے سے اپنے ارادوں کو واضح کرتے ہوئے کہا ہے کہ وہ ایران کے نئے رہنما کے انتخاب کے عمل میں ذاتی طور پر شامل ہونے کا ارادہ رکھتے ہیں۔

صدر ڈونلڈ ٹرمپ نے ایک انٹرویو میں یہ انکشاف کیا ہے کہ انہیں ایران کے اگلے رہنما کے انتخاب میں ذاتی طور پر شامل ہونے کی ضرورت ہے، بالکل اسی طرح جیسے انہوں نے وینیزویلا کے معاملے میں کیا تھا۔

انہوں نے تسلیم کیا کہ مقتول سپریم لیڈر علی خامنہ ای کے بیٹے مجتبیٰ خامنہ ای کے جانشین بننے کے سب سے زیادہ امکانات ہیں، لیکن انہوں نے واضح کیا کہ ان کے لیئے یہ نتیجہ ناقابل قبول ہے۔

یہ بھی پڑھیں : شہید علی خامنہ ای کے صاحبزادے آیت اللہ مجتبیٰ کو ایران کا نیا سپریم لیڈر چن لیا گیا؟

ان کا کہنا تھا کہ وہ لوگ اپنا وقت ضائع کر رہے ہیں، خامنہ ای کا بیٹا ہلکا آدمی ہے اور انہیں تقرری میں شامل ہونا پڑے گا۔ وہ ایسا نیا ایرانی رہنما قبول نہیں کریں گے، جو خامنہ ای کی پالیسیوں کو جاری رکھے کیونکہ اس سے امریکہ کو پانچ سال میں دوبارہ جنگ کی طرف جانا پڑے گا۔ وہ ایسا شخص چاہتے ہیں جو ایران میں ہم آہنگی اور امن لائے۔

صدر نے کہا کہ امریکہ ایران کے ڈرون اور میزائل صلاحیتوں کو ہر گھنٹے نشانہ بنا رہا ہے۔ ان کے پاس فضائیہ نہیں ہے، ان کے پاس فضائی دفاع نہیں ہے، ان کے تمام ہوائی جہاز جا چکے ہیں، ان کے مواصلات ختم ہو چکے ہیں۔

ٹرمپ کا کہنا تھا کہ امریکی فوج، اسرائیل کے ساتھ مل کر ایرانی اہداف کو وقت سے بہت پہلے مکمل طور پر مسمار کر رہی ہے۔ ایرانی حکومت کی 47 سال دہشت رہی ہے۔ انہوں نے دعویٰ کیا کہ حکومت نے معصوم ایرانی لوگوں کو نقصان پہنچایا ہے۔

صدر ٹرمپ کا یہ بھی کہنا تھا کہ ان کے پاس جنگ کے دوران تیل کی قیمتوں کو کم رکھنے کا منصوبہ ہے۔