اچھی صحت کیلئے روزانہ کتنا پانی پینا ضروری ہے؟ جانیے

ماہرین صحت کا کہنا ہے کہ روزانہ 8 گلاس پانی پینے کا مشورہ ہر شخص کے لیے یکساں نہیں ہوتا۔ پانی کی ضرورت عمر، جسمانی سرگرمی اور موسم کے مطابق بدل سکتی ہے۔

انسانی جسم کا تقریباً 60 فیصد حصہ پانی پر مشتمل ہوتا ہے اور یہ جسم کے تقریباً تمام افعال میں مددگار ہوتا ہے۔ پانی جسم سے زہریلے مادے خارج کرتا ہے، خلیات تک غذائی اجزاء پہنچاتا ہے، جوڑوں کو روان رکھتا ہے اور ہاضمہ کے نظام کو بہتر بناتا ہے۔

ماہرین کا کہنا ہے کہ اگر جسم کو مناسب مقدار میں پانی نہ ملے تو ڈی ہائیڈریشن کا خطرہ بڑھ جاتا ہے۔ اس کے نتیجے میں سانس کی بدبو، تھکن، سر چکرانا اور ذہنی الجھن جیسی علامات ظاہر ہو سکتی ہیں۔

عمر کے مطابق پانی کی مقدار

تحقیقات کے مطابق پانی کی ضرورت عمر کے حساب سے مختلف ہوتی ہے:

4 سے 8 سال کے بچوں کے لیے روزانہ تقریباً 7 کپ پانی مناسب ہے۔

9 سے 13 سال کے لڑکوں کے لیے 10 کپ اور لڑکیوں کے لیے 9 کپ پانی تجویز کیا گیا ہے۔

14 سے 18 سال کے لڑکوں کو روزانہ 14 کپ اور لڑکیوں کو 10 کپ پانی پینا چاہیے۔

بالغ خواتین کے لیے روزانہ تقریباً 2.7 لیٹر (11 کپ) اور مردوں کے لیے 3.7 لیٹر (15 کپ) پانی مناسب سمجھا جاتا ہے۔

ماہرین کے مطابق یہ تمام مقدار صرف پانی سے نہیں بلکہ پھلوں اور سبزیوں، چائے، کافی اور دیگر مشروبات سے بھی حاصل کی جا سکتی ہے۔ تقریباً 20 فیصد پانی کی ضرورت پھل اور سبزیوں سے پوری ہو جاتی ہے۔

پانی کی ضرورت کب بڑھ جاتی ہے؟

گرمی یا زیادہ پسینے کی صورت میں جسم کو زیادہ پانی کی ضرورت ہوتی ہے۔ بخار، نزلہ زکام یا دیگر بیماریوں کے دوران بھی زیادہ سیال استعمال کرنا مفید رہتا ہے۔ تاہم کچھ امراض جیسے دل یا گردے کی مخصوص بیماریاں پانی کی مقدار محدود کرنے کا تقاضا کر سکتی ہیں، اس لیے ڈاکٹر کی ہدایت پر عمل ضروری ہے۔

پانی کی کمی کی پہچان

جسم میں پانی کی کمی کا اندازہ پیشاب کے رنگ سے لگایا جا سکتا ہے۔ اگر پیشاب ہلکا یا تقریباً شفاف ہو تو جسم کو مناسب پانی مل رہا ہے۔ گہرا رنگ اس بات کی علامت ہے کہ مزید پانی درکار ہے۔

صحت مند رہنے کے لیے پانی کا مناسب استعمال بہت ضروری ہے۔ کسی بھی جسمانی مسئلے کی صورت میں معالج سے مشورہ کرنا بہتر ہے۔