پاسداران انقلاب کا اسرائیل پر میزائلوں کی نئی لہر سے مجتبیٰ خامنہ ای کا استقبال

ایران میں نئی قیادت کے قیام کے بعد اسرائیل کے خلاف فوجی کارروائیوں کا سلسلہ جاری ہے۔ ایرانی سرکاری ذرائع کے مطابق مجتبیٰ خامنہ ای کے رہبر اعلیٰ بننے کے بعد پہلی بار اسرائیل کی جانب میزائلوں کی ایک نئی لہر داغی گئی ہے۔

ایران کے سرکاری نشریاتی ادارے نے بتایا ہے کہ یہ میزائل حملے فوجی آپریشن کا حصہ تھے جسے ’’وعدہ صادق چار‘‘ کا نام دیا گیا ہے۔ حکام کے مطابق یہ اس کارروائی کی تیسویں لہر تھی، جس میں مختلف اہداف کو نشانہ بنایا گیا۔

ایرانی پاسداران انقلاب کے مطابق ان حملوں کا مقصد اسرائیل کے شمالی علاقوں میں واقع فوجی تنصیبات اور خطے میں موجود امریکی فوجی اڈوں کو نشانہ بنانا تھا۔ ایران کا کہنا ہے کہ یہ کارروائیاں اسرائیلی حملوں کے جواب میں کی جا رہی ہیں۔

یہ بھی پڑھیں : مجتبیٰ خامنہ ای کے انتخاب پر خوش نہیں ہوں، امریکی صدر

ایرانی سرکاری ذرائع نے میزائلوں کی تصاویر بھی جاری کیں، جن پر نئے رہبر اعلیٰ کے نام کے نعرے درج تھے۔ اس اقدام کو ایران میں نئی قیادت کے تحت جنگی حکمت عملی کے تسلسل کی علامت قرار دیا جا رہا ہے۔

دوسری جانب اسرائیلی ہنگامی امدادی اداروں کے مطابق ایک میزائل کو فضاء میں تباہ کر دیا گیا، تاہم اس کے ملبے کے گرنے سے وسطی اسرائیل کے شہر ریشون لیزیون میں ایک خاتون معمولی زخمی ہو گئی۔

اسرائیلی حکام کے مطابق شہریوں کو فوری طور پر محفوظ مقامات کی طرف جانے کی ہدایات دی گئیں اور کئی علاقوں میں خطرے کے سائرن بھی بجائے گئے۔