سیڑھیاں چڑھتے ہوئے اکثر افراد کا سانس کیوں پھول جاتا ہے؟ اہم وجہ سامنے آگئی

کیا آپ نے کبھی محسوس کیا ہے کہ سیڑھیاں چڑھتے ہوئے سانس پھول جاتا ہے یا سانس لینا مشکل لگتا ہے؟ اگر ایسا ہوتا ہے تو آپ اکیلے نہیں ہیں۔ یہ مسئلہ نہ صرف عام افراد بلکہ میراتھن دوڑنے والے ایثلیٹس کو بھی پیش آتا ہے۔ مشہور ایتھلیٹ ایمیلیا بونی نے بھی ایک ٹوئٹ میں بتایا کہ چند منزلیں چڑھنے کے بعد ان کا سانس پھول جاتا ہے۔

ماہرین کے مطابق سیڑھیاں چڑھنا جسم کے لیے ایک مشکل سرگرمی ہے کیونکہ یہ زمین پر چلنے یا بھاگنے سے مختلف انداز میں کام کرتا ہے۔ مشی گن یونیورسٹی کے پروفیسر ٹموتھی جے مائیکل کے مطابق جسم کے ہر پٹھے میں دو قسم کے مسل فائبرز ہوتے ہیں: سست رفتاری والے جو تھکن کے خلاف مزاحمت کرتے ہیں، اور تیز رفتاری والے جو فوری طاقت کی ضرورت کے لیے کام کرتے ہیں۔ سیڑھیاں چڑھتے وقت یہی تیز فائبرز زیادہ فعال ہوتے ہیں، جس سے جسم کو زیادہ توانائی کی ضرورت پڑتی ہے۔

مڈ ویسٹرن اسٹیٹ یونیورسٹی کے پروفیسر فرینک وائٹ کے مطابق سیڑھیاں چڑھنے کے دوران جسم میں کاربن ڈائی آکسائیڈ اور ہائیڈروجن کے توازن میں حساسیت بڑھ جاتی ہے۔ نتیجتاً تھکن اور سانس پھولنا جلدی محسوس ہوتا ہے۔

سیڑھیاں چڑھنے کے دوران پسینہ آنا فٹ ہونے کی نشانی بھی ہے۔ فٹ افراد جلد پسینہ خارج کرتے ہیں تاکہ جسم کو ٹھنڈا رکھا جا سکے۔ اس کے علاوہ کچھ اور وجوہات بھی ہیں:

کشش ثقل کے خلاف جدوجہد: جسم اوپر کی طرف حرکت کر رہا ہوتا ہے اور اپنا وزن اٹھا رہا ہوتا ہے، جس سے زیادہ مسلز کی ضرورت ہوتی ہے۔

تیاری نہ ہونا: روزمرہ میں سیڑھیاں بغیر وارم اپ کے چڑھنے سے مسلز تیار نہیں ہوتے، آکسیجن کی کمی اور تھکن محسوس ہوتی ہے۔

نئے مسلز کا استعمال: کچھ مسلز جو عام طور پر استعمال نہیں ہوتے، وہ حرکت میں آتے ہیں، جس سے سانس پھولتا ہے۔

آکسیجن کی کمی: جسم جب زیادہ آکسیجن استعمال کرتا ہے تو تھکن اور سانس پھولنا تیز ہو جاتا ہے۔

مختصر یہ کہ سیڑھیاں چڑھنا صرف ایک جسمانی سرگرمی نہیں بلکہ جسم کے پٹھوں اور پھیپھڑوں کے لیے ایک محنت طلب کام ہے۔ اسی وجہ سے کچھ افراد چند منزلوں کے بعد بھی سانس پھولنے کا احساس کرتے ہیں، جبکہ کچھ لوگ بغیر مشکل کے زیادہ منزلیں چڑھ سکتے ہیں۔