عالمی منڈی میں تیل کی قیمتوں میں دو فیصد سے زائد کا اضافہ

امریکا اور اسرائیل کی ایران کے خلاف جنگ کے باعث آبنائے ہرمز میں کشیدگی بڑھنے سے عالمی منڈی میں تیل کی قیمتوں میں نمایاں اضافہ دیکھنے میں آیا ہے۔

عالمی منڈی میں تیل کی قیمتوں میں اضافہ دیکھا گیا ہے، کیونکہ سرمایہ کاروں کو خدشہ ہے کہ ایران کے خلاف جاری جنگ کے باعث توانائی کی سپلائی متاثر ہو سکتی ہے۔ آج ابتدائی کاروبار کے دوران عالمی معیار کے خام تیل کی قیمت میں دو فیصد سے زیادہ اضافہ ریکارڈ کیا گیا۔

رپورٹس کے مطابق ایک بیرل برینٹ خام تیل کی قیمت تقریباً ایک سو دو ڈالر سے تجاوز کر گئی جبکہ امریکی خام تیل کی قیمت بھی پچانوے ڈالر سے زیادہ ہو گئی۔

جنگ کے تیسرے ہفتے میں داخل ہونے کے ساتھ ہی اہم آبی گزرگاہ آبنائے ہرمز میں جہازوں کی آمد و رفت شدید حد تک محدود ہو گئی ہے، جس سے عالمی منڈی میں سپلائی کے خدشات بڑھ گئے ہیں۔

یہ بھی پڑھیں : خارگ جزیرے پر جس سرزمین سے حملہ ہوا، اس کی تیل و گیس تنصیبات تباہ کر دیں گے، ایران

ماہرین کا کہنا ہے کہ اگر تجارتی جہازوں پر حملوں کا سلسلہ جاری رہا تو صورتحال تیزی سے بگڑ سکتی ہے اور عالمی توانائی منڈی مزید عدم استحکام کا شکار ہو سکتی ہے۔

ادھر امریکا کے صدر ڈونلڈ ٹرمپ نے اپنے اتحادی ممالک سے مطالبہ کیا ہے کہ وہ آبنائے ہرمز میں تجارتی جہازوں کے تحفظ کے لیے بحری جہاز تعینات کریں۔ انہوں نے برطانیہ، چین، فرانس، جاپان اور جنوبی کوریا سمیت دیگر ممالک سے اس مشن میں شامل ہونے کی اپیل کی ہے۔

اگر آئندہ ہفتوں میں آبنائے ہرمز کی صورتحال بہتر نہ ہوئی تو عالمی معیشت کو توانائی کی بڑھتی قیمتوں اور مہنگائی کے نئے دباؤ کا سامنا کرنا پڑ سکتا ہے۔