لبنان کے شہری علاقوں پر اسرائیلی حملے، چھ افراد شہید

لبنان کے دارالحکومت بیروت پر اسرائیلی فضائی حملوں نے شہری علاقوں کو نشانہ بنایا، جس کے نتیجے میں چھ افراد کی شہادتیں ریکارڈ کی گئیں ہیں۔

لبنان کی وزارت صحت کے مطابق اسرائیلی فضائیہ کی جانب سے دارالحکومت بیروت پر کئے گئے دو حملوں میں چھ افراد شہید اور چوبیس زخمی ہو گئے ہیں۔ یہ حملے شہر کے مرکزی علاقوں میں کئے گئے۔

یہ بھی پڑھیں : لبنان میں زمینی جنگ اسرائیلی معیشت پر بھاری پڑ سکتی ہے، رپورٹ

ابتدائی اطلاعات کے مطابق حملوں میں تین رہائشی عمارتوں کو نشانہ بنایا گیا۔ ایک حملہ زقاق البلاط کے علاقے میں ہوا، جو سرکاری دفاتر اور سفارت خانوں کے قریب واقع ہے جبکہ دوسرا حملہ بسطہ کے علاقے میں کیا گیا۔

عینی شاہدین کے مطابق متعدد دھماکوں کی آوازیں سنی گئیں، جس کے بعد امدادی ٹیمیں فوری طور پر موقع پر پہنچ گئیں۔ حکام کا کہنا ہے کہ ہلاکتوں کی شناخت ڈی این اے ٹیسٹ کے بعد مکمل کی جائے گی۔