ایران جنگ میں طیاروں اور ڈرونز کی تباہی، امریکی عسکری طاقت کو پہنچنے والے نقصانات کی فہرست

ایران سے جاری تصادم کے دوران امریکی فضائیہ اور فوجی طیاروں کو پہنچنے والے نقصانات کی ایک مفصل رپورٹ سامنے آئی ہے، جس کے مطابق جدید ترین لڑاکا طیاروں، ڈرونز اور ٹرانسپورٹ ہیلی کاپٹرز کی ایک بڑی تعداد یا تو تباہ ہو چکی ہے یا انہیں شدید نقصان پہنچا ہے۔

مشرقِ وسطیٰ میں جاری شدید کشیدگی اور فضائی معرکہ آرائی کے نتیجے میں امریکی فوج کو پہنچنے والے مادی نقصانات کے تازہ ترین اعداد و شمار موصول ہوئے ہیں۔

ان اعداد و شمار سے یہ ظاہر ہوتا ہے کہ جدید ترین ٹیکنالوجی سے لیس امریکی بیڑے کو میدانِ جنگ میں غیر متوقع مزاحمت کا سامنا ہے۔

رپورٹ کے مطابق، دنیا کے مہنگے ترین اور جدید ترین لڑاکا طیارے ایف پینتیس کا ایک یونٹ شدید متاثر ہوا ہے، جبکہ چار ایف پندرہ ای اسٹرائیک ایگل جیٹس کو بھی مختلف کارروائیوں میں نقصان پہنچا ہے۔

یہ بھی پڑھیں : ایران نے امریکی فوج کا ایک سی-130 طیارہ گرا دیا، لاپتہ پائلٹ کو بازیاب کرانے کا دعویٰ مسترد

اس کے علاوہ، زمینی اہداف کو نشانہ بنانے کے لیے مشہور اے دس تھنڈر بولٹ ٹو طیارہ بھی مار گرایا گیا ہے، جو امریکی فضائیہ کے لیے ایک بڑا دھچکا ہے۔

صرف لڑاکا طیارے ہی نہیں، بلکہ امریکی فضائی نگرانی اور کنٹرول کا مرکز سمجھے جانے والے ای تھری جی سینٹری (اویکس) طیارے کا ایک یونٹ بھی مکمل طور پر تباہ ہو چکا ہے۔

ایندھن کی فراہمی کے ذمہ دار آٹھ کے سی ایک سو پینتیس ٹینکر طیارے بھی متاثر ہوئے ہیں، جن میں سے ایک مکمل تباہ، ایک گر کر تباہ ہوا، ایک فضا میں دورانِ پرواز متاثر ہوا, جبکہ پانچ طیاروں کو ان کے اڈوں پر ہی نشانہ بنایا گیا۔

ڈرون ٹیکنالوجی کے شعبے میں بھی امریکہ کو بھاری قیمت چکانی پڑی ہے، جہاں اب تک سترہ ایم کیو نائن ریپر ڈرونز گرائے جا چکے ہیں۔

ہیلی کاپٹرز کی صورتحال بھی کچھ مختلف نہیں ہے، جہاں ایک یو ایچ ساٹھ بلیک ہاک اور دو ایچ ایچ ساٹھ جی پیو ہاک ہیلی کاپٹرز کو نقصان پہنچا ہے، جبکہ ایک سی ایچ سینتالیس چنوک ہیلی کاپٹر مکمل طور پر تباہ ہو گیا ہے۔

یہ نقصانات اس بات کی نشاندہی کرتے ہیں کہ ایران کا فضائی دفاعی نظام اور زمین سے فضا میں مار کرنے والے ہتھیار امریکی توقعات سے کہیں زیادہ مہلک ثابت ہو رہے ہیں۔