لبنان اور اسرائیل کے درمیان جنگ بندی میں تین ہفتوں کی توسیع کا اعلان

امریکی صدر نے وائٹ ہاؤس میں ہونے والے مذاکرات کے بعد لبنان اور اسرائیل کے درمیان جنگ بندی میں مزید تین ہفتوں کی توسیع کا اعلان کر دیا ہے۔

وائٹ ہاؤس کے اوول آفس میں لبنانی اور اسرائیلی حکام کے درمیان ہونے والی ایک اہم ملاقات کے بعد امریکہ کے صدر ڈونلڈ ٹرمپ نے لبنان اور اسرائیل کے درمیان جاری جنگ بندی میں مزید تین ہفتوں کی توسیع کا باقاعدہ اعلان کر دیا ہے۔

صدر ٹرمپ نے اپنی سوشل میڈیا ویب سائٹ پر اس ملاقات کو انتہائی کامیاب قرار دیا، جس میں امریکی نائب صدر جے ڈی وینس اور وزیر خارجہ مارکو روبیو بھی شریک تھے۔

یہ بھی پڑھیں : ڈونلڈ ٹرمپ کا خود مختار سیاستدان سے صیہونی لابی کے وفادار اتحادی تک کا سفر

صدر ٹرمپ نے اپنے بیان میں لبنان کے اندرونی حالات پر بھی تبصرہ کیا اور کہا کہ امریکہ لبنان کی مدد کرے گا تاکہ وہ خود کو حزب اللہ کے اثر و رسوخ سے محفوظ رکھ سکے۔

انہوں نے اسے ایک تاریخی موقع قرار دیتے ہوئے کہا کہ وہ بہت جلد اسرائیلی وزیراعظم بنیامین نیتن یاہو اور لبنانی صدر جوزف عون کی وائٹ ہاؤس میں میزبانی کرنے کے منتظر ہیں۔

نائب صدر جے ڈی وینس نے اس پیش رفت کا تمام تر کریڈٹ صدر ٹرمپ کی ذاتی دلچسپی اور براہ راست مداخلت کو دیا ہے۔ ان کا کہنا تھا کہ صدر ٹرمپ کی شمولیت کے بغیر یہ ناممکن تھا کہ اتنی جلدی جنگ بندی میں توسیع پر اتفاق ہو پاتا۔