اب واٹس ایپ، فیس بک اور انسٹاگرام استعمال کرنے کیلئے ماہانہ فیس ادا کرنی ہوگی؟ جانیے

دنیا کی معروف سوشل میڈیا کمپنی میٹا نے اپنے مقبول پلیٹ فارمز واٹس ایپ، فیس بک اور انسٹاگرام کے پریمیم ورژن متعارف کروانے کا اعلان کر دیا ہے۔ اس فیصلے کے بعد صارفین ماہانہ سبسکرپشن فیس ادا کر کے خصوصی فیچرز اور اضافی سہولتوں سے فائدہ اٹھا سکیں گے۔

کمپنی کا کہنا ہے کہ یہ سروس خاص طور پر ان افراد اور کاروباری اداروں کے لیے تیار کی جا رہی ہے جو سوشل میڈیا پلیٹ فارمز کو پیشہ ورانہ یا تجارتی مقاصد کے لیے استعمال کرتے ہیں۔

میٹا کے مطابق پریمیم ورژن میں صارفین کو ایسے جدید فیچرز تک رسائی حاصل ہوگی جو عام ورژن میں دستیاب نہیں ہوں گے۔ سبسکرائبر صارفین نئی اپ ڈیٹس اور خصوصی ٹولز سب سے پہلے استعمال کر سکیں گے۔ اس کے علاوہ اکاؤنٹ سیکیورٹی اور پرائیویسی کے حوالے سے اضافی سہولتیں بھی فراہم کی جائیں گی تاکہ صارفین کا ڈیٹا مزید محفوظ بنایا جا سکے۔

کمپنی نے بتایا ہے کہ کاروباری اکاؤنٹس کے لیے خصوصی ڈیجیٹل ٹولز بھی شامل کیے جائیں گے۔ ان ٹولز کی مدد سے کاروباری افراد اپنے صارفین تک بہتر انداز میں پہنچ سکیں گے، مارکیٹنگ سرگرمیوں کو مؤثر بنا سکیں گے اور اپنی آن لائن موجودگی کو مزید مضبوط کر سکیں گے۔ اس اقدام کا مقصد چھوٹے اور بڑے کاروباروں کو جدید سوشل میڈیا سہولتیں فراہم کرنا ہے۔

میٹا نے واضح کیا ہے کہ اس نئی پالیسی سے عام صارفین متاثر نہیں ہوں گے۔ واٹس ایپ، فیس بک اور انسٹاگرام کے موجودہ مفت ورژنز پہلے کی طرح دستیاب رہیں گے۔ بنیادی فیچرز کے استعمال پر کوئی فیس عائد نہیں کی جائے گی۔ پریمیم سروس مکمل طور پر اختیاری ہوگی اور صرف وہی صارفین اسے استعمال کریں گے جو اضافی سہولتیں حاصل کرنا چاہتے ہیں۔