PACRA نے بینک آف پنجاب کی ریٹنگ بڑھا کر AAA کر دی

لاہور: پاکستان کریڈٹ ریٹنگ ایجنسی (PACRA) نے بینک آف پنجاب کی طویل مدتی کریڈٹ ریٹنگ AA+ سے بڑھا کر AAA کر دی ہے، جبکہ قلیل مدتی ریٹنگ A1+ برقرار رکھی گئی ہے۔ اس کے ساتھ ہی بینک کا آؤٹ لک بھی مستحکم قرار دیا گیا ہے۔

اس کامیابی کے ساتھ بینک آف پنجاب پاکستان کا پہلا اور واحد صوبائی بینک بن گیا ہے جس نے ملک کی اعلیٰ ترین کریڈٹ ریٹنگ حاصل کی ہے۔ یہ کامیابی بینک کی مضبوط مالی کارکردگی، مؤثر رسک مینجمنٹ اور مسلسل ترقی کا مظہر ہے۔

سال 2025 کے دوران بینک کے ڈپازٹس 2 ٹریلین روپے سے تجاوز کر گئے، جبکہ بینک نے 40.7 ارب روپے کا قبل از ٹیکس منافع حاصل کیا، جو گزشتہ سال کے مقابلے میں 98.5 فیصد زیادہ ہے۔ اس نمایاں بہتری کی وجہ اثاثوں کے معیار میں بہتری، بنیادی آمدن میں اضافہ، مؤثر اخراجاتی نظم و نسق اور محتاط رسک مینجمنٹ کو قرار دیا گیا ہے۔

بینک آف پنجاب کے صدر اور چیف ایگزیکٹو ظفر مسعود نے کہا کہ AAA ریٹنگ اس بات کا ثبوت ہے کہ گزشتہ برسوں میں بینک نے مضبوط بنیادوں پر ایک مستحکم مالیاتی ادارہ تشکیل دیا ہے۔ انہوں نے کہا کہ یہ کامیابی نہ صرف بینک بلکہ پنجاب اور پاکستان کی ترقی کے لیے ادارے کے عزم کی عکاسی بھی کرتی ہے۔

بینک آف پنجاب پاکستان میں ڈیجیٹل قرضوں کی فراہمی، زرعی شعبے، خواتین کی مالی خودمختاری اور کم آمدنی والے طبقات کی مالی معاونت میں نمایاں کردار ادا کر رہا ہے۔ حکومت پنجاب کے اہم پروگرامز جیسے آسان کاروبار، کسان کارڈ، ٹیلنٹ ہنٹ اور اپنی چھت اپنا گھر کے ذریعے بھی بینک نے کاروباری افراد، کسانوں، خواتین اور چھوٹے قرض لینے والوں کو مالی سہولیات فراہم کی ہیں۔

ظفر مسعود نے مزید کہا کہ یہ کامیابی بینک کے ملازمین، بورڈ آف ڈائریکٹرز، شیئر ہولڈرز اور حکومت پنجاب کے اعتماد اور تعاون کا نتیجہ ہے۔ انہوں نے کہا کہ بینک آئندہ بھی مضبوط مالی بنیاد، ڈیجیٹل بینکنگ، مالی شمولیت اور تمام اسٹیک ہولڈرز کے لیے دیرپا قدر پیدا کرنے کے اپنے مشن کو جاری رکھے گا۔

ظفر مسعود نے مزید کہا کہ یہ کامیابی ہمارے لوگوں کی کامیابی ہے۔ ہم حکومت پنجاب، اپنے بورڈ آف ڈائریکٹرز، اپنے شیئر ہولڈرز اور بالخصوص وزیر اعلیٰ پنجاب محترمہ مریم نواز شریف صاحبہ کے شکر گزار ہیں، جنہوں نے بینک آف پنجاب اور اس کی اصلاحات پر اعتماد کا اظہار کیا۔ ہمارے عملے کی پیشہ ورانہ مہارت، محنت اور لگن نے اس کامیابی کو ممکن بنایا، اور ہم آئندہ بھی عوام کے اعتماد پر پورا اترتے ہوئے بہترین نتائج فراہم کرتے رہیں گے۔

بینک آف پنجاب بدستور ترقی، مضبوط مالی بنیاد، صارفین پر مرکوز ڈیجیٹل بینکنگ، مالی شمولیت اور تمام اسٹیک ہولڈرز کے لیے دیرپا قدر پیدا کرنے کے اپنے مشن کو جاری رکھے گا۔ بینک آف پنجاب پاکستان میں ایس ایم ایز کی فنڈنگ، زرعی قرضوں، کم لاگت ہاؤسنگ، خواتین کی کاروباری مالی معاونت اور ڈیجیٹل قرضوں کی فراہمی کے شعبوں میں نمایاں کردار ادا کر رہا ہے۔