سینیٹ کمیٹی کا صوبوں کو تیل و گیس کی آمدنی سے حصہ دینے کا مطالبہ

سینیٹ کمیٹی نے وفاقی وزارتیں کم کر کے سالانہ اربوں روپے بچانے اور صوبوں کو تیل و گیس سے حصہ دینے کا مطالبہ کیا کردیا ہے۔

سینیٹر ضمیر حسین کی زیر صدارت سینیٹ کی فنکشنل کمیٹی برائے ڈیولوشن کا اجلاس منعقد ہوا، جس میں 18ویں آئینی ترمیم کے بعد اختیارات کی منتقلی اور عملدرآمد کا تفصیل سے جائزہ لیا گیا۔ اجلاس کے دوران وفاقی حکومت کی تنظیمِ نو اور وزارتوں کی تعداد کم کرنے کی تجویز پر بحث کی گئی۔

ارکان کمیٹی کا کہنا تھا کہ غیر ضروری وزارتیں ختم کر کے سالانہ 4 سے 5 ہزار ارب روپے کی بچت کی جا سکتی ہے۔

یہ بھی پڑھیں : عالمی مالیاتی اداروں کا پاکستان کی معاشی کارکردگی پر اعتماد کا اظہار، ریٹنگ میں بہتری

اراکین نے زور دیا کہ وفاقی حکومت کو آئین کے مطابق محدود دائرہ کار میں کام کرنا چاہیے اور آئی ایم ایف پر انحصار کم کرنے کے لیے اخراجات کا ازسرنو جائزہ لینا چاہیے۔

سینیٹر جان محمد بلیدی نے کہا کہ مشترکہ مفادات کونسل کے اجلاس نہ ہونے سے آئینی تقاضے متاثر ہو رہے ہیں، ملک کو مالی بحران سے نکالنے کے لیے اخراجات میں کمی اور این ایف سی سمیت آئینی اداروں کو فعال بنانا ضروری ہے۔

کمیٹی کے کنوینئر سینیٹر ضمیر حسین نے شدید تشویش کا اظہار کرتے ہوئے کہا کہ سندھ سے روزانہ 3 ارب 70 کروڑ کا تیل نکلتا ہے اور خیبر پختونخواہ سے 42 فیصد تیل حاصل ہوتا ہے، لیکن 16 سال سے ان صوبوں کو ایک روپیہ نہیں دیا گیا۔

انہوں نے کہا کہ کمپنیاں اور کارپوریشنز منافع کما رہی ہیں، جبکہ عوام بھوک سے مر رہے ہیں۔ حکومت 18ویں ترمیم پر عملدرآمد نہیں کر رہی اور نہ ہی صوبوں کو سپورٹ کر رہی ہے، صوبوں کو ان کا جائز حصہ نہ دینا بری حکمرانی کی علامت ہے۔