ایران نے ثالثوں کے ذریعے بھیجی گئی امریکی تجاویز مسترد کر دیں، ایرانی نائب وزیر خارجہ

ایران کے نائب وزیر خارجہ کاظم غریب آبادی نے بیان میں کہا ہے کہ تہران نے ثالثوں کے ذریعے موصول ہونے والی امریکی تجاویز کو ان کے بے جا اور ناجائز مطالبات کے باعث سختی سے مسترد کر دیا ہے۔

ایرانی نائب وزیر خارجہ نے تفصیلات بتاتے ہوئے کہا کہ ان مذاکرات کا آغاز اسلام آباد میں ہوا تھا، جہاں امریکا کی جانب سے یہ کہا گیا تھا کہ اگر اس منصوبے کو مسترد کیا گیا تو بات چیت کو مکمل طور پر ناکام تصور کیا جائے گا۔ انہوں نے بتایا کہ مذاکرات کے اختتام پر ہوا بھی یہی اور امریکی وفد بات چیت کو ادھورا چھوڑ کر چلا گیا۔

یہ بھی پڑھیں : امریکا نے ایران کی ناکہ بندی کی تو اسے جنگ سمجھ کر بھرپور جواب دیا جائے گا، خاتم الانبیاء ہیڈکوارٹرز

کاظم غریب آبادی کا کہنا تھا کہ اس تمام صورتحال کے باوجود ایرانی وفد نے نہ تو امریکا پر کوئی زور دیا اور نہ ہی گفتگو کو آگے بڑھانے کی کوئی درخواست یا التجا کی۔

انہوں نے مزید بتایا کہ ایران کی جانب سے آبنائے ہرمز کو دوبارہ بند کیے جانے کے بعد عمان میں بھی بات چیت کا ایک راؤنڈ ہوا تھا۔ عمانی وفد نے تجویز دی تھی کہ بات چیت کے جاری رہنے تک آبنائے ہرمز کا جنوبی راستہ کھلا رکھا جائے، تاہم ایران نے اس تجویز کو بھی صاف رد کر دیا اور واضح کیا کہ مذاکرات کسی نتیجے پر پہنچنے سے پہلے ایسا ممکن نہیں ہے۔

ایرانی نائب وزیر خارجہ نے اپنے مؤقف کا اعادہ کرتے ہوئے کہا کہ آبنائے ہرمز کو بند رکھنے کی پالیسی مکمل طور پر برقرار ہے اور یہ تہران کی باوقار اور اصول پسندانہ سفارتکاری کی ایک واضح اور روشن مثال ہے۔