ملک بھر میں آج یوم شہدائے پولیس منایا جا رہا ہے

ملک بھر میں آج یوم شہدائے پولیس منایا جا رہا ہے، شہدا کی یادگاروں پر سلامی اور ان کو خراج تحسین پیش کرنے کا عمل جاری ہے۔

ملک بھر میں آج یوم شہدائے پولیس عقیدت و احترام کے ساتھ منایا جا رہا ہے۔ اس دن کو منانے کا بنیادی مقصد ملک کی سلامتی اور امن کی خاطر اپنی جانوں کا نذرانہ پیش کرنے والے عظیم سپوتوں کو خراج تحسین پیش کرنا ہے۔

دہشت گردی کے خلاف جنگ میں پولیس فورس نے ہمیشہ ہراول دستے کے طور پر کام کیا ہے اور اپنی قربانیوں سے قوم کے مستقبل کو محفوظ بنایا ہے۔

یہ بھی پڑھیں : پاک فوج اور خیبر پختونخوا پولیس کی فتنہ الخوارج کے خاتمے کیلئے مشترکہ مشقیں

فرض کی راہ میں جام شہادت نوش کرنے والے جوانوں کی یاد میں تمام چھوٹے بڑے شہروں میں خصوصی تقاریب کا اہتمام کیا گیا ہے۔

صدر مملکت، وفاقی وزرا، عسکری قیادت اور صوبائی پولیس سربراہان کی جانب سے شہدائے پولیس کو زبردست الفاظ میں خراج عقیدت پیش کیا گیا ہے اور ان کی قربانیوں کو قوم کے لیے باعث فخر قرار دیا گیا ہے۔

اس روز کی مناسبت سے ملک کے طول و عرض میں پولیس کے چاق و چوبند دستے شہدا کی یادگاروں اور ان کی قبروں پر حاضری دے کر سلامی پیش کر رہے ہیں اور پھولوں کی چادریں چڑھا رہے ہیں۔

چاروں صوبوں میں پولیس کے اعلیٰ حکام شہدا کے اہل خانہ سے ذاتی طور پر ملاقاتیں کر رہے ہیں اور ان میں تحائف اور یکجہتی کے پیغام تقسیم کر رہے ہیں۔ حکام کا کہنا ہے کہ پولیس شہدا کی یہ عظیم قربانیاں ہماری آنے والی نسلوں کے لیے مشعل راہ ہیں۔