امریکہ ایران تصادم کے بعد عالمی مارکیٹ میں خام تیل کی قیمتوں میں ایک ڈالر سے زائد کا اضافہ

امریکہ اور ایران کے درمیان فوجی تصادم کے باعث عالمی مارکیٹ میں خام تیل کی قیمتوں میں ایک ڈالر فی بیرل سے زائد کا اضافہ ہو گیا۔

جزیرہ لارک پر امریکی حملے اور اس کے جواب میں اردن میں واقع امریکی فوجی اڈوں پر ایران کی جانب سے بیلسٹک میزائل باری کے بعد عالمی مارکیٹ میں خام تیل کی قیمتیں بڑھ گئیں۔

پیر کے روز ابتدائی کاروباری اوقات کے دوران برینٹ کروڈ کے مستقبل کے سودوں میں 1.08 ڈالر یعنی 1.23 فیصد اضافہ ریکارڈ کیا گیا، جس کے بعد قیمت 89.18 ڈالر فی بیرل تک پہنچ گئی۔

اسی طرح امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت میں بھی 92 سینٹ یعنی 1.10 فیصد اضافہ دیکھا گیا اور یہ 84.32 ڈالر فی بیرل پر پہنچ گئی۔

یہ بھی پڑھیں : ایرانی جزیرہ لارک پر حملہ عالمی تجارت کے بہاؤ کے تحفظ کے لیے کیا گیا، سینٹ کام کا دعویٰ

مارکیٹ ماہرین کے مطابق مشرقِ وسطیٰ میں سیکیورٹی کشیدگی کی نئی لہر نے عالمی ایندھن کی سپلائی لائن کے حوالے سے تشویش پیدا کر دی ہے۔

آئی جی مارکیٹ کے معروف تجزیہ کار ٹونی سائکامور نے رائٹرز سے بات کرتے ہوئے کہا کہ یوں لگتا ہے کہ ہم ایک بار پھر دونوں ممالک کے درمیان شدید کشیدگی کے مرحلے میں داخل ہو چکے ہیں۔

انہوں نے کہا کہ یہ طے کرنا فی الحال ناممکن ہے کہ قیمتوں میں یہ اضافہ اور تناؤ کا یہ سلسلہ کتنے دنوں یا ہفتوں تک برقرار رہے گا۔