میر رضا کیس: جوڈیشل کمیشن نے معلومات دینے کیلئے ای میل اور واٹس ایپ نمبر جاری کردیا

کراچی: میر رضا کیس کی تحقیقات کے لیے قائم جوڈیشل کمیشن نے واقعے سے متعلق اہم معلومات رکھنے والے شہریوں سے رابطے کے لیے ای میل ایڈریس اور واٹس ایپ نمبر جاری کردیا۔

جوڈیشل کمیشن کے مطابق کیس سے متعلق معلومات commission_mcr@shc.gov.pk پر ای میل کے ذریعے بھیجی جاسکتی ہیں، جبکہ شہری 0321-3850899 پر واٹس ایپ کے ذریعے بھی معلومات فراہم کرسکتے ہیں۔

کمیشن نے عوام سے اپیل کی ہے کہ اگر کسی شخص کے پاس میر رضا کیس سے متعلق کوئی اہم، مستند یا مفید معلومات موجود ہیں تو وہ تحقیقاتی عمل میں معاونت کے لیے متعلقہ تفصیلات فراہم کرے۔

اس سے قبل جوڈیشل کمیشن نے کیس سے متعلق اہم معلومات فراہم کرنے والے افراد کے لیے ایک لاکھ روپے انعام مقرر کرنے کی ہدایت بھی کی تھی۔ انعام کا مقصد ایسے افراد کو سامنے آنے کی ترغیب دینا ہے جو واقعے کے حوالے سے اہم شواہد یا معلومات رکھتے ہوں۔

میر رضا کیس کی تحقیقات کے لیے سندھ حکومت نے چیف جسٹس سندھ ہائیکورٹ کو جوڈیشل کمیشن تشکیل دینے کے لیے خط لکھا تھا، جس کے بعد عدالت نے جسٹس عمر سیال کو کمیشن کی سربراہی کے لیے نامزد کیا۔

جسٹس عمر سیال کی سربراہی میں قائم کمیشن نے کیس کی تحقیقات کا آغاز کردیا ہے اور واقعے سے متعلق مختلف پہلوؤں کا جائزہ لیا جارہا ہے۔

کمیشن کی جانب سے عوامی معلومات حاصل کرنے کے لیے رابطے کی تفصیلات جاری کیے جانے کے بعد شہری براہ راست کمیشن کو کیس سے متعلق معلومات فراہم کرسکیں گے، تاکہ تحقیقات میں حقائق تک پہنچنے میں مدد مل سکے۔