اپنی چھت اپنا گھر پروگرام، بلاسود قرضوں کی فراہمی کا ہدف دوگنا کردیا گیا

لاہور: پنجاب حکومت نے اپنی چھت اپنا گھر پروگرام کے تحت ریکارڈ تعداد میں درخواستیں موصول ہونے کے بعد رواں مالی سال کے دوران بلاسود قرضوں کی فراہمی کا ہدف دوگنا کردیا ہے۔

پنجاب حکومت کے مطابق اپنی چھت اپنا گھر پروگرام کے تحت کم ترین وقت میں 243 ارب روپے سے زائد کے بلاسود قرضے فراہم کیے جاچکے ہیں، جو صوبے میں کم آمدنی والے خاندانوں کے لیے رہائشی سہولت کی فراہمی کے حوالے سے اہم پیش رفت ہے۔

حکومت نے شہریوں کی جانب سے موصول ہونے والی ریکارڈ درخواستوں کو مدنظر رکھتے ہوئے رواں مالی سال میں ہی قرضوں کی فراہمی کا ہدف دوگنا کرنے کا فیصلہ کیا ہے۔

اس حوالے سے صوبائی وزیر ہاؤسنگ بلال یاسین کی زیر صدارت ایک اعلیٰ سطحی اجلاس منعقد ہوا، جس میں ڈی جی پھاٹا، سی ای او اربن یونٹ اور بینک آف پنجاب کے حکام نے شرکت کی۔

اجلاس کے دوران متعلقہ حکام نے اپنی چھت اپنا گھر پروگرام کی مجموعی پیش رفت، قرضوں کی منظوری اور مکانات کی تعمیر سے متعلق تفصیلی بریفنگ دی۔

حکام نے بتایا کہ پروگرام کے تحت منظور شدہ قرضوں کی مجموعی تعداد 2 لاکھ سے تجاوز کرچکی ہے۔

بریفنگ میں بتایا گیا کہ پروگرام کے مثبت نتائج کے باعث اب تک 1 لاکھ 14 ہزار سے زائد مکانات کی تعمیر مکمل ہوچکی ہے۔

حکام کے مطابق 45 ہزار 254 گھر اس وقت زیر تعمیر ہیں، جن کی تعمیر کا عمل جاری ہے۔

اجلاس میں شہریوں کی جانب سے موصول ہونے والی درخواستوں اور قرضوں کی فراہمی کے عمل میں موجود رکاوٹوں کا بھی جائزہ لیا گیا۔

صوبائی وزیر ہاؤسنگ بلال یاسین نے تمام زیر التوا ادائیگیاں فوری طور پر جاری کرنے کی ہدایت کردی۔

انہوں نے متعلقہ حکام کو ہدایت کی کہ قرضوں کی فراہمی کے عمل میں غیر ضروری تاخیر سے گریز کیا جائے۔

بلال یاسین نے واضح کیا کہ قرضوں کی فراہمی میں تاخیر سے متعلق شکایات پر سخت ایکشن لیا جائے گا۔

صوبائی وزیر ہاؤسنگ نے کہا کہ اپنی چھت اپنا گھر پروگرام کا بنیادی مقصد مستحق خاندانوں کو اپنی باعزت اور محفوظ چھت فراہم کرنا ہے۔

انہوں نے کہا کہ بے گھر افراد کے لیے بلاسود قرضوں کی سہولت گھر کی تعمیر کے لیے آسان اور شفاف راستہ فراہم کررہی ہے۔

بلال یاسین کا کہنا تھا کہ حکومت کی جانب سے پروگرام کے دائرہ کار کو بڑھانے کا مقصد زیادہ سے زیادہ مستحق خاندانوں کو اپنی چھت کی سہولت فراہم کرنا ہے۔

انہوں نے کہا کہ ریکارڈ درخواستیں اس بات کا ثبوت ہیں کہ شہریوں میں اپنے گھر کی تعمیر کے لیے بلاسود قرضوں کی اس سہولت کی طلب موجود ہے۔

صوبائی وزیر نے مزید کہا کہ وزیراعلیٰ پنجاب نے سرکاری خزانے کے وسائل کا رخ براہ راست عوامی خدمت اور فلاحی منصوبوں کی جانب موڑ دیا ہے۔

ان کے مطابق اپنی چھت اپنا گھر پروگرام کے ذریعے مستحق خاندانوں کو گھر کی تعمیر کے لیے عملی مالی معاونت فراہم کی جارہی ہے۔

پنجاب حکومت کا کہنا ہے کہ قرضوں کی فراہمی کا ہدف دوگنا کرنے سے مزید خاندان اس پروگرام سے مستفید ہوسکیں گے اور صوبے میں کم آمدنی والے افراد کے لیے اپنی رہائش کا خواب پورا کرنے میں مدد ملے گی۔