کراچی سے مدینہ براہِ راست پروازیں شروع، فلائی ڈیل کا اہم اعلان

کراچی: سعودی عرب کی کم لاگت فضائی کمپنی فلائی ڈیل نے کراچی اور مدینہ کے درمیان براہِ راست پروازوں کا آغاز کردیا، جس سے پاکستان اور سعودی عرب کے درمیان فضائی رابطوں میں مزید اضافہ ہوگیا ہے۔

سعودیہ گروپ سے وابستہ ایئرلائن نے اتوار کے روز مدینہ سے کراچی کے لیے اپنی پہلی پرواز روانہ کرکے نئے روٹ کا باضابطہ افتتاح کیا۔ نئے فضائی آپریشن کے تحت فلائی ڈیل دونوں شہروں کے درمیان ہفتے میں 2 براہِ راست پروازیں چلائے گی۔

ایئرلائن کے مطابق کراچی اور مدینہ کے درمیان پروازوں کے لیے ایئربس A320neo طیارے استعمال کیے جائیں گے، جن میں مکمل اکانومی کلاس کی 186 نشستیں موجود ہیں۔ جدید طیاروں میں مسافروں کی سہولت اور سفر کے تجربے کو بہتر بنانے کے لیے مختلف سہولیات بھی فراہم کی گئی ہیں۔

ہر نشست پر USB-A اور USB-C چارجنگ پورٹس دستیاب ہوں گے، جبکہ طیاروں میں بڑے اوورہیڈ بنز اور موڈ لائٹنگ کی سہولت بھی موجود ہے، جس کا مقصد دورانِ سفر مسافروں کو زیادہ آرام فراہم کرنا ہے۔

فلائی ڈیل کے بین الاقوامی نیٹ ورک میں مدینہ کراچی سے براہِ راست منسلک ہونے والا دوسرا سعودی شہر بن گیا ہے۔ اس سے قبل ایئرلائن کراچی کو ریاض کے ساتھ براہِ راست فضائی رابطہ فراہم کر رہی تھی۔

نئی سروس کے آغاز کے بعد پاکستان میں فلائی ڈیل کا نیٹ ورک 7 روٹس تک وسیع ہوگیا ہے، جس سے کراچی سے سعودی عرب جانے والے مسافروں کو مزید سفری آپشنز دستیاب ہوں گے۔

نئی پروازیں خصوصاً عمرہ اور دیگر مذہبی، کاروباری و ذاتی مقاصد کے لیے سعودی عرب جانے والے مسافروں کے لیے سفری سہولت میں اضافہ کریں گی۔

فلائی ڈیل نے کراچی اور مدینہ کے درمیان براہِ راست فضائی سروس کے آغاز کو پاکستان اور سعودی عرب کے درمیان فضائی رابطوں کو مزید مضبوط بنانے کی جانب اہم پیش رفت قرار دیا ہے۔