اے آئی سے انسانیت کے خاتمے کا 10 فیصد خطرہ؟ انتھروپک محقق کا اہم انتباہ

مصنوعی ذہانت (اے آئی) کے ممکنہ مستقبل کے خطرات سے متعلق ایک اہم انتباہ سامنے آیا ہے، جس میں دعویٰ کیا گیا ہے کہ آئندہ ایک دہائی کے دوران اے آئی ٹیکنالوجی کے باعث انسانیت کے خاتمے کا تقریباً 10 فیصد امکان موجود ہے۔

یہ انتباہ اے آئی سیفٹی پر کام کرنے والے محقق جیکب کوسن کی جانب سے سامنے آیا، جو انتھروپک سے وابستہ رہے ہیں۔ کوسن نے کمپنی چھوڑنے کا اعلان کرتے ہوئے کہا کہ مختلف اے آئی کمپنیاں ایسے سپر انٹیلی جنس سسٹمز تیار کرنے کی دوڑ میں شامل ہیں جو مستقبل میں خود کو بہتر بنانے کی صلاحیت حاصل کرسکتے ہیں۔

خود کو بہتر بنانے والے سسٹمز سے مراد ایسے مصنوعی ذہانت کے نظام ہیں جو انسانی مداخلت کے بغیر اپنی صلاحیتوں اور کارکردگی میں بہتری لانے کے قابل ہوں۔ اگرچہ اس نوعیت کے مکمل خود مختار سسٹمز ابھی موجود نہیں، تاہم بڑی ٹیکنالوجی کمپنیاں اس سمت میں تحقیق جاری رکھے ہوئے ہیں۔

کوسن نے اپنے بیان میں خبردار کیا کہ اے آئی کی تیز رفتار ترقی کو نظر انداز کرنا خطرناک ہوسکتا ہے۔ ان کے مطابق مستقبل کے انتہائی طاقتور اے آئی سسٹمز سائبر سیکیورٹی سمیت مختلف شعبوں میں غیر معمولی صلاحیتیں حاصل کرسکتے ہیں اور وسائل و اختیار تک رسائی پیدا کرسکتے ہیں۔

انہوں نے یہ خدشہ بھی ظاہر کیا کہ موجودہ رفتار سے اے آئی کی ترقی جاری رہی تو رواں دہائی کے اختتام تک ایسے سسٹمز وجود میں آسکتے ہیں جو انسانیت کے لیے انتہائی سنگین خطرہ بن جائیں۔

کوسن کے بیان پر انتھروپک کی سائنسی ٹیم کے سربراہ ایون ہیوبینگر نے ردعمل دیتے ہوئے کہا کہ وہ بنیادی خدشے سے اتفاق کرتے ہیں۔ ان کے مطابق ذاتی طور پر ان کا اندازہ ہے کہ آئندہ ایک دہائی میں اے آئی کے نتیجے میں انسانیت کے خاتمے کا امکان تقریباً 10 فیصد ہوسکتا ہے۔

ہیوبینگر نے یہ بھی کہا کہ انتھروپک کی جانب سے ممکنہ خطرات کو کم کرنے کے لیے کوششیں کی جارہی ہیں، تاہم ان کے بقول کمپنی کے پاس سپر انٹیلی جنس سے پیدا ہونے والے خطرات سے نمٹنے کے لیے فی الحال کوئی مکمل منصوبہ موجود نہیں۔

ان کا کہنا تھا کہ موجودہ اے آئی ماڈلز سے لاحق خطرہ نسبتاً کم ہے، جبکہ اصل تشویش مستقبل میں سپر انٹیلی جنس سسٹمز کے ممکنہ ظہور سے متعلق ہے۔ انہوں نے مزید کہا کہ اس شعبے میں پیش رفت ان کی توقعات سے زیادہ تیزی سے جاری ہے۔

تاہم یہ امر قابلِ ذکر ہے کہ انسانیت کے خاتمے کے 10 فیصد امکان کا دعویٰ ایک ماہر کی ذاتی تشخیص ہے، اسے کسی سائنسی طور پر ثابت شدہ پیش گوئی کے طور پر نہیں دیکھا جاسکتا۔ انتھروپک کی جانب سے ان بیانات پر تاحال باضابطہ ردعمل جاری نہیں کیا گیا۔