ایرانی ریال کی قدر میں تاریخی کمی

ایرانی ریال کی قدر میں ایک بار پھر نمایاں کمی ریکارڈ کی گئی ہے۔

 امریکی ڈالر کے مقابلے میں ایرانی کرنسی کی قیمت تاریخی سطح تک پہنچ گئی۔ ایران کی اوپن مارکیٹ میں ایک امریکی ڈالر 23 لاکھ ریال سے بھی تجاوز کرگیا ہے۔ دوسری جانب پاکستانی مارکیٹ میں ایرانی ریال کی طلب اب بھی برقرار ہے۔

ایرانی مرکزی بینک کے جاری کردہ اعداد و شمار کے مطابق 100 پاکستانی روپے کے بدلے اب 5 لاکھ 85 ہزار 842 ایرانی ریال مل رہے ہیں۔ گزشتہ روز 100 پاکستانی روپے کی قیمت 5 لاکھ 83 ہزار 516 ریال تھی۔ اس طرح پاکستانی روپے کے مقابلے میں بھی ایرانی ریال کی قدر مزید کم ہوئی ہے۔ ایک پاکستانی روپے کی قیمت تقریباً 5 ہزار 858 ایرانی ریال بنتی ہے۔

امریکی ڈالر کے سرکاری نرخ میں بھی اضافہ دیکھا گیا ہے۔ ایک ڈالر کی قیمت گزشتہ روز 16 لاکھ 19 ہزار 512 ریال تھی۔ اب یہ بڑھ کر 16 لاکھ 24 ہزار 371 ریال ہوگئی ہے۔

اوپن مارکیٹ میں ڈالر اور یورو مہنگے

ایرانی بلیک مارکیٹ میں امریکی ڈالر کی قیمت 22 لاکھ 80 ہزار سے بڑھ کر 23 لاکھ 10 ہزار ریال تک پہنچ گئی ہے۔ یورو کی قیمت بھی بڑھ گئی ہے۔ ایک یورو تقریباً 26 لاکھ 50 ہزار سے 26 لاکھ 80 ہزار ریال میں فروخت ہورہا ہے۔

دیگر بڑی عالمی کرنسیوں کے مقابلے میں بھی ایرانی ریال کی قدر میں کمی ہوئی ہے۔ ایک یورو 18 لاکھ 88 ہزار 746 ریال کا ہوگیا۔ برطانوی پاؤنڈ کی قیمت 21 لاکھ 99 ہزار 693 ریال ریکارڈ کی گئی۔

سوئس فرانک 20 لاکھ 7 ہزار 759 ریال، اماراتی درہم 4 لاکھ 42 ہزار 307 ریال اور سعودی ریال 4 لاکھ 33 ہزار 166 ریال تک پہنچ گیا۔ اسی طرح ایک ترک لیرا 33 ہزار 527 ریال، بھارتی روپیہ 17 ہزار 132 ریال اور چینی یوآن 2 لاکھ 56 ہزار 573 ریال کے برابر ہوگیا ہے۔

ایرانی مرکزی بینک کی جانب سے مانیٹر کی جانے والی 45 کرنسیوں میں سے 42 کی قدر ایرانی ریال کے مقابلے میں بڑھ گئی۔ اس سے اندازہ ہوتا ہے کہ ریال کو مختلف عالمی کرنسیوں کے مقابلے میں شدید دباؤ کا سامنا ہے۔

پاکستان میں ایرانی ریال کی خریداری جاری

ایرانی ریال کی قدر میں مسلسل کمی کے باوجود پاکستان کی اوپن مارکیٹ میں اس کرنسی کی طلب موجود ہے۔ ایران میں جنگ کے بعد بعض پاکستانی شہری ریال خریدنے میں دلچسپی لے رہے ہیں۔ ان کا مقصد مستقبل میں ریال کی قدر بڑھنے کی صورت میں منافع حاصل کرنا ہے۔

تاہم جنگ دوبارہ شروع ہونے کے بعد گزشتہ چند ہفتوں کے دوران ایرانی ریال خریدنے کا رجحان کچھ کم ہوا ہے۔ مارکیٹ ذرائع کے مطابق ایک کروڑ ایرانی ریال کا پیکٹ اس وقت کم از کم 5 ہزار سے 6 ہزار پاکستانی روپے میں خریدا اور فروخت کیا جارہا ہے۔

اس کے مقابلے میں اپریل کے دوران ایک کروڑ ایرانی ریال کا یہی پیکٹ 8 ہزار سے 10 ہزار روپے تک میں دستیاب تھا۔ اس طرح پاکستانی مارکیٹ میں بھی ایرانی کرنسی کی قیمت میں واضح فرق سامنے آیا ہے۔