254 کلو وزن سے 96 کلو تک، امریکی شہری نے چھ سال میں زندگی بدل لی

امریکی ریاست جارجیا سے تعلق رکھنے والے ایک شخص کا وزن جب 254 کلوگرام تک پہنچ گیا تو ان کی روزمرہ زندگی شدید متاثر ہونے لگی۔ وہ اپنی تصاویر میں خود کو پہچاننے سے بھی قاصر ہونے لگے اور انہیں خدشہ تھا کہ اگر وزن کم نہ کیا تو صحت کے سنگین مسائل کا سامنا ہوسکتا ہے۔

34 سالہ ہنری گوانزلو کے مطابق ایک وقت میں ان کی کمر کا سائز 62 انچ تک پہنچ گیا تھا اور وہ روزانہ بڑی مقدار میں فاسٹ فوڈ استعمال کرتے تھے۔ ان کا کہنا ہے کہ انہیں خدشہ ہونے لگا تھا کہ وہ جوانی میں ہی زندگی سے محروم ہوجائیں گے۔

ہنری کے مطابق وہ ایک وقت میں اتنا کھانا منگواتے تھے جو ایک چار افراد کے خاندان کے لیے کافی ہوتا تھا۔ بڑھتے ہوئے وزن کے باعث انہیں جوتے پہننے، اپنے لیے مناسب کپڑے تلاش کرنے اور کچھ دیر کھڑے رہنے میں بھی دشواری کا سامنا کرنا پڑتا تھا۔

ان کے مطابق 254 کلوگرام وزن کے دوران انہیں ہائی بلڈ شوگر، ہائی بلڈ پریشر، جگر پر چربی، ہائی کولیسٹرول اور سینے میں تکلیف جیسے صحت کے مسائل کا بھی سامنا رہا۔ مسلسل تھکن اور جسمانی سرگرمی کی کمی نے ان کی روزمرہ زندگی کو مزید متاثر کیا۔

زندگی میں تبدیلی لانے کا فیصلہ کرنے کے بعد ہنری نے ابتدائی طور پر گیسٹرک بائی پاس سرجری کے بارے میں سوچا، تاہم بعد میں انہوں نے غذا اور ورزش کے ذریعے وزن کم کرنے کی کوشش کرنے کا فیصلہ کیا۔ نومبر 2019 میں انہوں نے اس سفر کا آغاز کیا اور ایک ذاتی ٹرینر کی جانب سے تیار کردہ پروگرام پر عمل کرنا شروع کیا۔

ان کے مطابق تقریباً چھ برس کے دوران وہ 158 کلوگرام سے زیادہ وزن کم کرنے میں کامیاب ہوئے اور اب بھی اسی طرزِ زندگی پر عمل جاری رکھے ہوئے ہیں۔ ان کی کمر کا سائز 60 انچ سے کم ہو کر 34 انچ رہ گیا ہے، جبکہ جوتوں کا سائز بھی 12 سے گھٹ کر 10 ہوگیا ہے۔

ہنری اب زیادہ تر گھر کا سادہ کھانا کھاتے ہیں جس میں چکن، مچھلی، چاول اور سبزیاں شامل ہوتی ہیں۔ ان کا کہنا ہے کہ وہ اپنی غذا میں پروٹین کو زیادہ اہمیت دیتے ہیں اور گزشتہ چار برس سے تقریباً ایک جیسی خوراک کو معمول بنائے ہوئے ہیں۔

غذا میں تبدیلی کے ساتھ وہ ہفتے میں چار دن وزن اٹھانے کی ورزش کرتے ہیں اور روزانہ تقریباً چار سے چھ میل تک پیدل چلتے ہیں۔

ہنری گوانزلو کے مطابق وزن کم ہونے کے بعد ان کی زندگی میں نمایاں تبدیلی آئی ہے اور اب وہ پہلے کے مقابلے میں زیادہ متحرک زندگی گزار رہے ہیں۔ تاہم ان کا تجربہ ذاتی نوعیت کا ہے اور وزن کم کرنے کا مناسب طریقہ ہر فرد کی صحت اور طبی ضروریات کے مطابق مختلف ہوسکتا ہے۔