ٹرین میں سفر کرنے والوں کیلئے بُری خبر آگئی

پاکستان ریلوے نے لاہور اور راولپنڈی کے درمیان چلنے والی ٹرینوں میں مسافروں کے لیے نئی سہولیات متعارف کروانے کے بعد کرائے میں اضافہ کر دیا ہے۔

 نئے نظام کے تحت اب مسافروں کو سفر کے دوران چائے کے علاوہ ناشتہ بھی فراہم کیا جائے گا، جس میں برگر، سینڈوچ، پیٹی، چپس، کیک اور جوس شامل ہیں۔

پاکستان ریلوے کے مطابق ان اضافی سہولیات کی فراہمی کے باعث پنڈی ریل کار، سبُک خرّم اور سبُک رفتار ٹرینوں کے تمام اے سی اور اکنامی کلاس کے کرائے میں 150 سے 250 روپے تک اضافہ کیا گیا ہے۔

 نئے کرائے اس طرح ہیں: اے سی پارلر کرایہ 2,500 روپے، اے سی بزنس 2,250 روپے، اے سی اسٹینڈرڈ 2,100 روپے اور اکنامی کلاس 1,300 روپے ہے۔

یہ واضح رہے کہ روزانہ لاہور اور راولپنڈی کے درمیان تین ہزار سے زائد مسافر سفر کرتے ہیں۔ پاکستان ریلوے ایک منافع بخش سرکاری ادارہ ہے جو ایندھن کی قیمتوں میں تبدیلی یا اضافی سہولیات کے مطابق کرایوں میں اضافہ یا کمی کرتا ہے تاکہ مسافروں کو بہتر خدمات فراہم کی جا سکیں۔