ہونڈا موٹر سائیکل خریدنے کے خواہشمندوں کیلئے بڑی خوشخبری

پاکستان کی معروف موٹر سائیکل ساز کمپنی اٹلس ہونڈا نے صارفین کے لیے موٹر سائیکل خریدنے کا ایک نیا آسان اور سود سے پاک طریقہ متعارف کروایا ہے۔

کمپنی نے اسٹینڈرڈ چارٹرڈ بینک کے "SC Aasan” پلان کے ذریعے خریداروں کو سہولت دی ہے کہ وہ ہونڈا موٹر سائیکل کو 3، 6 یا 12 ماہ کی آسان اقساط میں حاصل کر سکیں، اور اس دوران انہیں کسی قسم کا سود ادا نہ کرنا پڑے۔

اس اسکیم کے تحت کنونشنل کریڈٹ کارڈ ہولڈرز اپنی ادائیگی کو ماہانہ اقساط میں تقسیم کر سکتے ہیں، تاہم قسطوں کی مدت کے مطابق ایک مرتبہ کی پراسیسنگ فیس بکنگ کے وقت ادا کرنا لازمی ہوگی۔

 تین ماہ کی اقساط پر 1.99 فیصد، چھ ماہ کی اقساط پر 5.99 فیصد، جبکہ بارہ ماہ کی اقساط پر 11.99 فیصد پراسیسنگ فیس لاگو ہوگی، جس کے ساتھ اضافی ٹیکسز بھی شامل ہوں گے۔

مزید برآں، صارف کے علاقے کے مطابق فیڈرل ایکسائز ڈیوٹی (FED) بھی علیحدہ چارج کی جائے گی، جو مختلف علاقوں میں مختلف شرح پر لاگو ہوتی ہے۔

اٹلس ہونڈا کے مطابق اس اسکیم کا مقصد مالی مشکلات کا شکار متوسط طبقے کو بغیر کسی دباؤ کے موٹر سائیکل خریدنے کا موقع فراہم کرنا ہے۔ کمپنی کا کہنا ہے کہ اس سہولت کے ذریعے صارفین صرف 13 ہزار روپے ماہانہ ادا کر کے اپنی پسندیدہ ہونڈا بائیک حاصل کر سکتے ہیں، جو ان کی روزمرہ آمد و رفت میں آسانی کا باعث بنے گی۔