پاکستان میں کیش لیس اکانومی؛ بڑی پیشرفت سامنے آگئی

وزیراعظم شہباز شریف نے لین دین کو مزید محفوظ بناتے ہوئے کیش لیس پاکستان اسٹریٹجی کی منظوری دے دی۔

کیش لیس اکانومی ( cashless economy ) کے فروغ کے لیے حکومت نے اہم اقدامات کا آغاز کر دیا جس کے حوالے سے وزیرخزانہ سینیٹر محمد اورنگزیب نے حکومتی حکمت عملی سے متعلق تحریری رپورٹ پارلیمان میں پیش کردی۔

وفاقی وزیر خزانہ محمد اورنگ زیب  کے مطابق حکومت نے رواں مالی سال میں ڈیجیٹل لین دین کا ہدف 115 ارب مقرر کیا اور وزیراعظم نے کیش لیس پاکستان اسٹریٹجی کی منظوری دے دی۔

انھوں نے کہا کہ ڈیجیٹل معیشت کے وژن کے ساتھ اہم اہداف کا تعین کیا گیا ہے، ادائیگیاں آسان، محفوظ اور سب کے لیے قابل رسائی بنانا چاہتے ہیں، کیش لیس پاکستان اسٹریٹجی کے تحت جون 2026 تک 4 اہداف مقرر کیے ہیں۔

ڈیجیٹل لین دین کو 705 ارب سے بڑھا کر 115 ارب کیا جائے گا، کیو آر کوڈ سمیت ڈیجیٹل ذرائع سے ادائیگیاں کرنے والے تاجروں کی تعداد کو 20 لاکھ تک بڑھایا جائے گا۔

ڈیجیٹل ایپ صارفین کی تعداد 95 ملین سے بڑھا کر 120 ملین کرنے کا منصوبہ ہے۔ ڈیجیٹل ذرائع سے 100 فیصد ترسیلات زر کی وصولی کو یقینی بنایا جائے گا، ڈیجیٹل انفراسٹرکچر کے قیام کے لیے اقدامات اٹھائے جارہے ہیں۔

وفاقی وزیر خزانہ نے کہا کہ راست سسٹم کے ذریعے سرکاری ادائیگیوں اور وصولیوں کو تیزی سے ڈیجیٹل بنایا جارہا ہے، انٹرنیٹ دستیابی کو وسعت دی جارہی ہے، ڈیجیٹل نیشن پاکستان پروگرام کو فعال بنایا جارہا ہے۔