آسان اقساط پر اپنا گھر بنانے کے خواہشمند افراد کیلئے بڑی خبر

لاہور ڈویلپمنٹ اتھارٹی (ایل ڈی اے) نے شہریوں کے لیے آسان اقساط پر پلاٹ فراہم کرنے کے سلسلے میں پانچویں کمپیوٹرائزڈ قرعہ اندازی مکمل کر لی ہے۔

یہ قرعہ اندازی ایل ڈی اے اسپورٹس کمپلیکس جوہر ٹاؤن میں منعقد ہوئی۔ تقریب میں ڈی جی ایل ڈی اے طاہر فاروق کی خصوصی ہدایت پر شفاف کمپیوٹرائزڈ نظام استعمال کیا گیا۔ اس نظام کے ذریعے تمام پلاٹس میرٹ کی بنیاد پر کامیاب امیدواروں کو الاٹ کیے گئے۔

قرعہ اندازی میں لاہور کی مختلف اہم اسکیمیں شامل تھیں۔ ان میں جوہر ٹاؤن، ایل ڈی اے سٹی، علامہ اقبال ٹاؤن اور موہلنوال کے رہائشی اور کمرشل پلاٹس شامل کیے گئے۔ شہریوں کی بڑی تعداد نے اس عمل میں دلچسپی ظاہر کی۔

ایل ڈی اے سٹی بزنس سینٹر کے تحت چار مرلہ کمرشل پلاٹس الاٹ کیے گئے۔ اسی طرح جوہر ٹاؤن میں دو سے ڈھائی مرلہ کمرشل اور ساڑھے تین مرلہ رہائشی پلاٹس شامل تھے۔ علامہ اقبال ٹاؤن میں فروٹ مارکیٹ اور تین مرلہ کمرشل پلاٹس بھی قرعہ اندازی کا حصہ رہے۔ ایل ڈی اے انکلیو موہلنوال بلاک ڈی میں تین مرلہ رہائشی پلاٹس بھی کامیاب امیدواروں کے نام کیے گئے۔

ڈی جی ایل ڈی اے طاہر فاروق کے مطابق شہری ان پلاٹس کی قیمت تین سال کے دوران 12 برابر اقساط میں ادا کریں گے۔ اس سہولت کا مقصد عام شہریوں کے لیے گھر یا کاروباری پلاٹ حاصل کرنا آسان بنانا ہے۔

انہوں نے کہا کہ ایل ڈی اے مستقبل میں بھی مزید اسکیمیں متعارف کروائے گا تاکہ زیادہ سے زیادہ شہری اپنے گھر کے خواب کو پورا کر سکیں۔ ادارہ شفافیت اور میرٹ کو اولین ترجیح دے رہا ہے۔