ایزی پیسہ صارفین کیلئے پریشان کن خبر آگئی

پاکستان کے معروف ڈیجیٹل مالیاتی پلیٹ فارم ایزی پیسہ کی سروسز میں اچانک تعطل آنے کے باعث ملک بھر میں لاکھوں صارفین کو شدید مشکلات کا سامنا کرنا پڑا۔ کئی گھنٹوں تک صارفین مختلف مالیاتی خدمات استعمال نہ کر سکے جس کے بعد کمپنی نے باضابطہ طور پر تکنیکی خرابی کی تصدیق کر دی۔

ایزی پیسہ کی جانب سے جاری بیان میں کہا گیا کہ بعض صارفین کو وقفے وقفے سے سروسز تک رسائی میں مسائل پیش آ رہے ہیں۔ ماہر تکنیکی ٹیمیں مسلسل کام کر رہی ہیں تاکہ خرابی کو جلد از جلد دور کرکے تمام خدمات مکمل طور پر بحال کی جا سکیں۔

سروسز متاثر ہونے کے بعد صارفین نے سوشل میڈیا پر اپنی شکایات کا اظہار کیا۔ متعدد افراد لاگ اِن نہ ہونے، رقم کی منتقلی میں رکاوٹ، موبائل اکاؤنٹس تک رسائی نہ ملنے اور بلوں کی ادائیگی میں مشکلات کی شکایت کرتے رہے۔ کئی کاروباری افراد نے بھی بتایا کہ آن لائن لین دین متاثر ہونے سے روزمرہ کاروباری سرگرمیوں میں خلل پیدا ہوا۔

صارفین کی جانب سے یہ سوال بھی اٹھایا گیا کہ اتنے بڑے پیمانے پر سروس متاثر ہونے کے باوجود کمپنی کی جانب سے باضابطہ وضاحت کافی دیر بعد کیوں جاری کی گئی۔ سوشل میڈیا پلیٹ فارمز پر #EasypaisaOutage کا ہیش ٹیگ ٹرینڈ کرتا رہا اور ہزاروں صارفین نے اپنی پریشانی کا اظہار کیا۔

ایزی پیسہ پاکستان کے سب سے بڑے ڈیجیٹل ادائیگی نظاموں میں شمار ہوتا ہے۔ دستیاب اعداد و شمار کے مطابق اس کے رجسٹرڈ صارفین کی تعداد تقریباً 5 کروڑ 90 لاکھ ہے۔ یہی وجہ ہے کہ سروسز میں آنے والی کسی بھی خرابی کے اثرات لاکھوں افراد تک پہنچتے ہیں۔