آئی ایم ایف سولر پینلز پر ٹیکس میں اضافہ نہ کرنے پر رضامند

حکومت پاکستان اور عالمی مالیاتی ادارے (آئی ایم ایف) کے درمیان سولر پینلز پر ٹیکس سے متعلق اہم پیش رفت سامنے آئی ہے۔

 ذرائع کے مطابق مجوزہ اضافے کو واپس لینے پر اصولی اتفاق ہو گیا ہے، جس کے بعد سولر مصنوعات پر نیا ٹیکس نافذ نہیں کیا جائے گا۔

وزیراعظم شہباز شریف کی کوششوں اور مذاکرات کے نتیجے میں آئی ایم ایف نے سولر پینلز اور اسٹیشنری اشیاء پر اضافی ٹیکس عائد نہ کرنے پر رضامندی ظاہر کی ہے۔ یہ فیصلہ آئندہ مالی سال 2026-27 کے بجٹ کی تیاری کے دوران سامنے آیا ہے۔

حکومتی ذرائع کے مطابق یہ پیش رفت عوامی مفاد کے تحفظ کے حوالے سے ایک اہم کامیابی تصور کی جا رہی ہے۔ حکومت کا مؤقف تھا کہ سولر انرجی پہلے ہی مہنگی بجلی کے متبادل کے طور پر استعمال ہو رہی ہے، اس پر اضافی ٹیکس عوام پر بوجھ بڑھا سکتا ہے۔

دوسری جانب آئی ایم ایف اور حکومت کے درمیان ریئل اسٹیٹ سیکٹر سے متعلق ٹیکس پالیسیوں پر بات چیت جاری ہے۔ ان مذاکرات میں ممکنہ رعایتوں اور ریونیو اہداف پر غور کیا جا رہا ہے۔