پیٹرول کے بعد مٹی کے تیل کی قیمت میں بھی اضافہ، ٹوٹیفکیشن جاری

وفاقی حکومت نے مٹی کے تیل کی قیمت میں اضافہ کر دیا ہے۔

ملک بھر میں مٹی کے تیل کی نئی قیمت 301 روپے 14 پیسے فی لیٹر مقرر کی گئی ہے۔ قیمت میں 2 روپے 99 پیسے فی لیٹر کا اضافہ کیا گیا ہے اور نئے نرخ فوری طور پر نافذ کر دیے گئے ہیں۔

حکومتی ذرائع کے مطابق مٹی کے تیل کی قیمت میں تبدیلی عالمی مارکیٹ میں خام تیل کی قیمتوں، درآمدی اخراجات، روپے کی قدر میں اتار چڑھاؤ اور دیگر متعلقہ عوامل کو سامنے رکھتے ہوئے کی گئی ہے۔

مٹی کا تیل آج بھی ملک کے کئی دور دراز اور پہاڑی علاقوں میں اہم ایندھن کے طور پر استعمال ہوتا ہے۔ بعض دیہی علاقوں میں لوگ اسے کھانا پکانے، روشنی اور سرد موسم میں حرارت حاصل کرنے کے لیے بھی استعمال کرتے ہیں۔ ایسے میں قیمت میں اضافے سے ان گھرانوں کے ماہانہ اخراجات بڑھنے کا امکان ہے جو اپنی روزمرہ ضروریات کے لیے مٹی کے تیل پر انحصار کرتے ہیں۔