تیل کی قیمتوں میں مسلسل اضافہ ہوتا رہا تو عوام کیلئے ٹارگٹڈ سبسڈی کا نظام متعارف کروایا جا سکتا ہے، وزیر پیٹرولیم

وفاقی حکومت نے پیٹرولیم مصنوعات کی قیمتوں سے متعلق مستقبل کی حکمت عملی پر اہم اشارہ دیتے ہوئے واضح کیا ہے کہ اگر عالمی سطح پر جنگی حالات برقرار رہے اور خام تیل کی قیمتوں میں مسلسل اضافہ ہوتا رہا تو عوام کو ریلیف فراہم کرنے کے لیے ٹارگٹڈ سبسڈی کا نظام دوبارہ متعارف کروایا جا سکتا ہے۔

 وزیر پیٹرولیم علی پرویز ملک نے اس حوالے سے میڈیا سے گفتگو کرتے ہوئے کہا کہ حکومت عوام کو غیر ضروری مالی بوجھ سے بچانے کے لیے مختلف آپشنز پر غور کر رہی ہے۔ عالمی منڈی میں خام تیل کی قیمتیں براہ راست پاکستان میں پیٹرولیم مصنوعات کی قیمتوں پر اثر انداز ہوتی ہیں۔ چند روز قبل عالمی مارکیٹ میں قیمتوں میں کمی دیکھنے میں آئی تھی، لیکن حالیہ علاقائی کشیدگی اور جنگی خدشات کے باعث قیمتوں نے دوبارہ اوپر جانا شروع کر دیا ہے۔ حکومت مسلسل عالمی صورتحال کا جائزہ لے رہی ہے اور ہر تبدیلی پر نظر رکھے ہوئے ہے۔

انہوں نے کہا کہ حکومت نے پیٹرولیم مصنوعات کی قیمتوں کے تعین کے لیے سات روزہ اوسط قیمت کا طریقہ کار اختیار کیا ہوا ہے۔ اس نظام کا مقصد قیمتوں میں اچانک اتار چڑھاؤ کے اثرات کو کم کرنا اور پیٹرول پمپوں پر غیر ضروری رش یا مصنوعی قلت جیسے مسائل سے بچنا ہے۔ اس طریقہ کار کے تحت عالمی منڈی میں ہونے والی تبدیلیوں کو متوازن انداز میں مقامی قیمتوں میں شامل کیا جاتا ہے۔

علی پرویز ملک نے کہا کہ حکومت عالمی منڈی میں ہونے والی قیمتوں کی تبدیلی کو روکنے کے بجائے شفاف انداز میں عوام تک منتقل کرتی ہے۔ موجودہ معاشی حالات اور بین الاقوامی مالیاتی اداروں کے ساتھ کیے گئے معاہدوں کی وجہ سے حکومت کے مالی وسائل محدود ہیں، اس لیے قیمتوں میں من مانی کمی کرنا ممکن نہیں۔

انہوں نے کہا کہ اگر خطے میں کشیدگی کم ہوتی ہے، جنگ بندی قائم رہتی ہے اور عالمی سطح پر خام تیل کی قیمتوں میں کمی آتی ہے تو اس کا فائدہ پاکستانی صارفین کو بھی ضرور پہنچے گا۔ تاہم اگر حالات اس کے برعکس رہے اور قیمتوں میں مسلسل اضافہ ہوتا رہا تو کم آمدن والے طبقے کو تحفظ دینے کے لیے ٹارگٹڈ سبسڈی کی بحالی پر سنجیدگی سے غور کیا جائے گا۔

وزیر پیٹرولیم کے مطابق مجوزہ ٹارگٹڈ سبسڈی کا مقصد صرف مستحق اور ضرورت مند افراد کو ریلیف فراہم کرنا ہوگا تاکہ سرکاری وسائل کا درست استعمال یقینی بنایا جا سکے۔ حکومت ایسی پالیسی پر کام کر رہی ہے جس سے ایک طرف عوام کو سہولت ملے اور دوسری طرف قومی خزانے پر غیر ضروری بوجھ بھی نہ پڑے۔