‘ہم نے دشمن کیساتھ وہی کیا جو ایک باوقار قوم کو زیب دیتا ہے’، وزیر اعظم کا قوم سے خطاب

انہوں نے کہا کہ بھارت نے پہلگام کو بہانا بنا کر بلاجواز جنگ مسلط کی، دشمن نے گھمنڈ میں ہماری سرحدوں کی حرمت پامال کرنے کی کوشش کی۔

انکا کہنا تھا کہ بھارت نے میزائلوں سے معصوم جانوں کو نشانہ بناکر ہمارے صبر کا امتحان لیا، فوجی تنصیبات پر حملہ کیاگیا،دشمن کو اسی کی زبان میں جواب دینے کا فیصلہ کیا۔

وزیر اعظم کا مزید کہنا تھا کہ دشمن نے گزشتہ دنوں بزدلانہ اورشرمناک فعل کیا، بہادر افواج نے پیشہ ورانہ انداز میں دشمن کو بھرپور جواب دیا۔

انہوں نے کہا کہ ہم نے فیصلہ کیا جو بات میز پرہونی تھی اب میدان جنگ میں ہوگی، بہادر سپوتوں نے چند گھنٹے میں دشمن کی توپوں کو خاموش کیا، دشمن کے فوجی اڈے ،اسلحہ ڈپو ،ایئرفیلڈز سب ملبے کے ڈھیر بن گئے، ہم نے دشمن کے ساتھ وہی کیا جو ایک باوقار قوم کو زیب دیتا ہے۔

بھارت کے رافیل طیارے شاہینوں کے سامنے فیل ہوگئے، سیاسی جماعتوں اورپارلیمان کا بھی بے مثال اتحاد پر شکریہ ادا کرتا ہوں، اللہ تعالیٰ نے قوم کو شاندار فتح سے نوازا ہے۔

وزیر اعظم شہبازشریف نے کہا کہ امن کیلئے جنگ بندی کی تجویز کا مثبت جواب دیا، تمام تصفیہ طلب مسائل کے حل کیلئے پرامن مذاکرات کا راستہ اپنایا جائے گا۔

دوسری جانب صدر مملکت آصف علی زرداری نے پاک بھارت کشیدگی اور جنگ بندی پر کہا کہ مجھے پاکستان کی مسلح افواج، پاک بحریہ اور فضائیہ پر ہمیشہ سے یقین رہا ہے۔