اے سی لگائے بغیر گھر کو کیسے ٹھنڈا رکھیں؟ جانیے

شدید گرمی اور ہیٹ ویوز میں اضافہ ہونے کے بعد دنیا بھر میں ایئر کنڈیشنر کے استعمال میں تیزی سے اضافہ ہو رہا ہے، تاہم ماہرین کا کہنا ہے کہ اے سی کے بغیر بھی گھر کو کافی حد تک ٹھنڈا رکھا جا سکتا ہے۔

ماہرین کے مطابق زیادہ اے سی استعمال کرنے سے بجلی کی کھپت بڑھتی ہے اور توانائی کے نظام پر دباؤ پڑتا ہے۔ اسی لیے قدرتی طریقوں سے گھروں کو ٹھنڈا رکھنا زیادہ بہتر اور کم خرچ حل سمجھا جاتا ہے۔

ماہرین کا کہنا ہے کہ کھڑکیوں پر پردے، شٹرز یا سایہ دار انتظامات کرنے سے سورج کی گرمی گھر کے اندر کم داخل ہوتی ہے۔

اس کے علاوہ گھروں میں مناسب ہوا کی آمدورفت یعنی وینٹیلیشن بھی ضروری ہے تاکہ گرم ہوا باہر نکل سکے اور تازہ ہوا اندر آ سکے۔

ماہرین کے مطابق دیواروں اور چھتوں پر ہلکے یا چمکدار رنگ استعمال کرنے سے سورج کی حرارت کم جذب ہوتی ہے، جس سے گھر نسبتاً ٹھنڈا رہتا ہے۔

گھروں اور محلوں کے اطراف درخت لگانے سے ماحول کا درجہ حرارت کم رکھنے میں مدد ملتی ہے۔ سایہ دار جگہیں گرمی کی شدت کم کرنے میں مؤثر ثابت ہوتی ہیں۔

اگرچہ پنکھے اے سی جتنی ٹھنڈک نہیں دیتے، لیکن مناسب وینٹیلیشن کے ساتھ ان کا استعمال گھر کے ماحول کو بہتر بنا سکتا ہے۔