‘نیتن یاہو کا وزیراعظم آفس جاسوسوں سے بھرا ہوا ہے’

اسرائیل کے سابق وزیر اعظم نفتالی بینیٹ نے بینجمن نیتن یاہو پر بڑا الزا الزام عائد کردیا۔

عرب میڈیا کے مطابق نفتالی بینیٹ نے الزام عائد کیا ہے کہ نیتن یاہو نے قطری حکام کے خلاف الزامات کی تحقیقات کی مخالفت کی اور وہ اس واقعے کو چھپانے کے لیے تفتیش کاروں سے لڑ رہے ہیں۔

نیتن یاہو کے سابق ترجمان ایلی فیلڈسٹین پر اسرائیلی قابض افواج سے خفیہ دستاویزات چوری اور لیک کرکے قومی سلامتی سے سمجھوتہ کرنے کا الزام بھی عائد کیا گیا ہے۔

یہ الزام لگایا گیا ہے کہ انہوں نے ایک بین الاقوامی کمپنی کے ذریعے قطر کے لئے کام کیا تھا جو اسرائیلی میڈیا میں قطر نواز بیانیے کو فروغ دینے میں مصروف تھی۔

بینیٹ نے کہا کہ وزیر اعظم کا دفتر اسرائیل کا سب سے حساس سکیورٹی مرکز ہے، اگر یہ اقدامات جان بوجھ کر کیے گئے تو یہ سراسر غداری ہے اور اگر نادانستہ طور پر کیے تو قطر نے اسرائیل کی قیادت میں دراندازی کی۔

سابق صیہونی وزیراعظم کا کہنا تھا کہ نیتن یاہو کے پاس فوجیوں کو جنگ میں بھیجنے کا کوئی اخلاقی اختیار نہیں ہے۔

نفتالی بینیٹ نے کہا کہ نیتن یاہو کے  فیصلوں پر کوئی کیسے بھروسہ کر سکتا ہے جس کا دفتر اسرائیل کے دشمنوں کی مالی اعانت سے چلنے والے جاسوسوں سے بھرا ہوا ہے؟