غزہ میں جنگ بندی؛ مصر نے نئی تجاویز پیش کردیں

قاہرہ: اسرائیل کی جانب سے غزہ پر حملوں کے بعد مصری حکام نے جنگ بندی معاہدے سے متعلق نئی تجاویز پیش کر دیں۔

مصر کی جانب سے پیش کی گئی نئی تجاویز کے تحت حماس ہر ہفتے 5 اسرائیلی یرغمالیوں کو رہا کرے گی اور پہلے ہفتے کے بعد اسرائیل جنگ بندی معاہدے کے دوسرے مرحلے پر عمل کرے گا۔

خبر رساں ایجنسی کا کہنا ہے کہ سکیورٹی ذرائع کے مطابق اس پیشکش کو امریکا اور حماس نے قبول کر لیا ہے تاہم اسرائیل کی جانب سے اس پر تاحال کوئی ردعمل نہیں آیا۔

مزید پڑھیں: اسرائیل کا جنوبی لبنان سرحد سے فوج واپس بلانے سے صاف انکار

مزید پڑھیں: مصری بلے کا سرحد پار اسرائیلی فوجیوں پر حملہ، اسرائیلی میڈیا

ذرائع کے مطابق نئی تجاویز  میں اسرائیل کے مکمل انخلا کے لیے بھی ایک ٹائم لائن دی گئی ہے جس  کی ضمانت امریکا کی جانب سے دی جائے گی اور یہ معاہدہ یرغمالیوں کی رہائی کے بدلے طے پائے گا۔

دوسری جانب فلسطینی حکام کا کہنا ہے کہ اسرائیل کی جانب سے گزشتہ ہفتے دوبارہ حملے شروع کرنے کے بعد سے غزہ میں تقریباً 700 فلسطینی شہید ہوچکے ہیں۔

خبررساں ایجنسی کے مطابق حماس کے ایک عہدیدار نے براہ راست اس تجویز کی تصدیق تو نہیں کی لیکن کہا کہ مذاکرات کاروں کے ساتھ کئی تجاویز پر بات چیت جاری ہے تاکہ جنگ بندی کے دوسرے مرحلے پر متفقہ بنیادوں پر عملدرآمد کیا جا سکے۔

خیال رہے کہ اسرائیلی حملوں سے شہید ہونے والے 400 خواتین اور بچے شامل ہیں جبکہ حماس کے مطابق اس کے کئی اعلیٰ رہنما بھی حملوں میں شہید  ہوچکے ہیں۔