ایران کے کویت پر حملے میں چھ امریکی فوجیوں کی ہلاکت کی تصدیق

ایران اور امریکا کے درمیان جاری کشیدگی کے دوران کویت میں ایک حملے میں چھ امریکی فوجیوں کی ہلاکت کی تصدیق کی گئی ہے۔

امریکی فوج کے مطابق کویت کی شعیبہ بندرگاہ پر قائم ایک عارضی آپریشن مرکز ایرانی حملے کا نشانہ بنا، جس کے نتیجے میں چھ امریکی فوجی ہلاک ہو گئے۔

امریکی مرکزی کمان نے بتایا کہ ابتدائی طور پر تین ہلاکتوں کی اطلاع ملی تھی، تاہم بعد ازاں مزید دو اہلکاروں کی باقیات ملنے کے بعد تعداد چھ ہو گئی۔

یہ بھی پڑھیں : امریکہ اور اسرائیل کے حملوں میں اب تک 555 ایرانی شہید ہوئے : حلال احمر

امریکی وزیر دفاع پیٹ ہیگستھ نے کہا کہ حملہ ایک مضبوط بنائے گئے عسکری مرکز پر کیا گیا تھا، تاہم ایک میزائل یا ڈرون فضائی دفاعی نظام کو عبور کرنے میں کامیاب رہا۔ حملہ مقامی وقت کے مطابق صبح کے وقت ہوا اور اس میں عمارت کو شدید نقصان پہنچا۔

مشترکہ افواج کے سربراہ جنرل ڈین کین نے ہلاک ہونے والے اہلکاروں کو قوم کا بہترین سرمایہ قرار دیتے ہوئے ان کے اہل خانہ سے تعزیت کا اظہار کیا۔

امریکی حکام کے مطابق اس کارروائی کے بعد خطے میں تعینات فوجیوں کو مزید خطرات لاحق ہو سکتے ہیں، جبکہ مجموعی طور پر متعدد اہلکار زخمی بھی ہوئے ہیں۔