سعودی عرب کا حجاج کرام کی حفاظت کے لیے اہم اقدامات کا اعلان

سعودی عرب میں حج 2026 کے دوران حجاج کرام کی حفاظت کے لیے اہم اقدامات کر دیے گئے ہیں۔

 سعودی سول ڈیفنس فورسز نے اعلان کیا ہے کہ آج سے مقدس مقامات کے اندر ہر قسم کے مائع گیس سلنڈرز لانے اور استعمال کرنے پر مکمل پابندی ہوگی۔ یہ پابندی حجاج کے رہائشی مراکز، سرکاری دفاتر اور دیگر سہولیات پر بھی لاگو ہوگی۔

سعودی حکام کے مطابق یہ فیصلہ حج سیزن میں آگ لگنے کے ممکنہ خطرات کو کم کرنے کے لیے کیا گیا ہے۔ لاکھوں حجاج کی موجودگی میں معمولی غفلت بھی بڑے حادثے کا سبب بن سکتی ہے، اسی لیے حفاظتی انتظامات مزید سخت کیے جا رہے ہیں۔

سول ڈیفنس نے واضح کیا ہے کہ اگر کسی مقام پر گیس سلنڈر یا کھانا پکانے والا چولہا استعمال ہوتا پایا گیا تو اسے فوری طور پر ضبط کر لیا جائے گا۔ اس کے علاوہ خلاف ورزی کرنے والوں کے خلاف متعلقہ سیکیورٹی اداروں کی مدد سے قانونی کارروائی بھی کی جائے گی۔

رپورٹس کے مطابق نگرانی کرنے والی خصوصی ٹیمیں منیٰ، مزدلفہ اور عرفات میں مسلسل چیکنگ کریں گی۔ ان ٹیموں کو ہدایت دی گئی ہے کہ وہ کسی بھی غیر قانونی یا خطرناک سامان کی فوری نشاندہی کریں تاکہ کسی ناخوشگوار واقعے سے بچا جا سکے۔

سعودی سول ڈیفنس کا کہنا ہے کہ مقدس مقامات پر موجود تمام عمارتوں، خیموں اور رہائشی مراکز کی نگرانی سخت کر دی گئی ہے۔ حجاج کرام کو بھی ہدایت دی گئی ہے کہ وہ حفاظتی اصولوں پر مکمل عمل کریں اور کسی بھی مشکوک چیز کی فوری اطلاع حکام کو دیں۔