سعودی عرب : منشیات کی اسمگلنگ میں ملوث پاکستانیوں سمیت پانچ افراد گرفتار

سعودی عرب کی وزارت داخلہ نے کافی کریمر کی کھیپ میں چھپائی گئی نشہ آور ایمفیٹامائن کی 80 لاکھ سے زائد گولیاں قبضے میں لے کر پاکستانیوں سمیت پانچ افراد کو گرفتار کرلیا۔

سعودی پریس ایجنسی کے مطابق سعودی حکام نے مملکت میں منشیات کی اسمگلنگ اور ڈسٹری بیوشن نیٹ ورکس کو نشانہ بنانے والی ایک سکیورٹی کارروائی میں ممنوعہ مادہ قبضے میں لے لیا ہے۔ مبینہ طور پر یہ گولیاں کافی کریمر کے کنٹینرز میں چھپائی گئی تھیں۔

یہ بھی پڑھیں : ایران کو سعودی عرب کا دشمن قرار دینا ناقابل قبول ہے: ایرانی صدر

حکام نے منشیات کی اسمگلنگ میں ملوث ہونے کے الزام پر پاکستانیوں سمیت پانچ افراد کو گرفتار کیا ہے، جن کے بارے میں کہا جا رہا ہے وہ تارکین وطن ہیں اور وزٹ ویزوں کی میعاد ختم ہونے کے باوجود ملک میں رہ رہے تھے۔

ملزمان کے خلاف ابتدائی قانونی اقدامات کر لیئے گئے ہیں، جنہیں اب پبلک پراسیکیوشن کے حوالے کر دیا گیا ہے۔