ملک بھر میں اسکول سے باہر بچوں کی تعداد میں اضافہ ہوگیا

اسلام آباد: پاکستان میں اسکول سے باہر بچوں کی تعداد میں تشویشناک حد تک اضافہ ہو رہا ہے۔

پاکستان انسٹیٹیوٹ آف ایجوکیشن (پی آئی ای)نے بتایا گیا ہے کہ پاکستان میں 2 کروڑ 62 لاکھ کے قریب بچے اسکول سے باہر ہیں۔

پی آئی ای کے مطابق صرف صوبہ پنجاب میں ایک کروڑ 11 لاکھ سے زائد بچے تعلیم سے محروم ہیں جبکہ سندھ میں 70 لاکھ سے زائد بچے اسکولوں سے باہر ہیں۔

اس کے علاوہ خیبرپختونخوا میں 36 لاکھ اور بلوچستان میں 31 لاکھ سے زائد بچے تعلیم سے محروم ہیں، اسلام آباد میں تقریباً 80 ہزار تعلیم سے محروم ہیں اور بلوچستان میں سب سے زیادہ 65 فیصد بچے اسکول سے باہر ہیں۔

یہ بھی پڑھیں: 2023 پاکستانیوں کے لئے بھیانک سال قرار، اہم تفصیلات

پاکستان انسٹیٹیوٹ آف ایجوکیشن نے بتایا کہ اسکول جانے کی عمر کے 39 فیصد بچے اس وقت اسکول سے باہر ہیں۔

پی آئی ای کے مطابق اس سے قبل 2016-17 میں اسکول نہ جانے والے بچوں کی تعداد 44 فیصد تھی، 2021-22 میں 39 فیصد بچے تعلیم سے محروم تھے، ہائرسیکنڈری سطح پر 2021-22 میں 60 فیصد بچے اسکول سے باہر تھے اور درمیانی اورپرائمری سطح پر 44 فیصد بچے اسکول سے باہر ہیں۔