نئی پالیسی سے بجلی کی قیمتوں میں بڑی کمی کا امکان

بجلی صارفین پر گنجائش کی ادائیگی کا بوجھ کم کرنے کے لیے حکومت نے ایک نیا منصوبہ تیار کیا ہے جس کے تحت بجلی کی قیمتوں میں 10 روپے فی یونٹ کمی کی جاسکتی ہے۔

سرکاری دستاویزات کے مطابق ‘بجلی دو، پیسے لو’ یا ‘ٹیک اینڈ پے’ کی پالیسی پر عمل درآمد کے لیے انڈیپینڈنٹ پاور پروڈیوسرز (آئی پی پیز) کے ساتھ بات چیت جاری ہے۔

اس منصوبے کے تحت صرف بجلی پیدا کرنے والی پاور کمپنیوں کو ادائیگیاں کی جائیں گی جس سے بے کار پاور پلانٹس کو گنجائش کی ادائیگی کا موجودہ نظام ختم ہوجائے گا۔

حکومت کی ٹاسک فورس نے تخمینہ لگایا ہے کہ اس پالیسی سے سالانہ 948 ارب روپے کی بچت ہوسکتی ہے جس سے صارفین کو 9.70 روپے فی یونٹ ریلیف ملے گا۔

اس وقت صارفین پر گنجائش کی ادائیگیوں کی وجہ سے سالانہ 1916 ارب روپے کا بوجھ ہے۔

اگر موجودہ آئی پی پیز کے ساتھ جاری مذاکرات کامیاب ہوجاتے ہیں تو صلاحیت کی لاگت میں اس کمی سے ملک بھر کے بجلی صارفین کو نمایاں ریلیف ملے گا۔