نوجوان لڑکی وزیراعظم کو تحفے میں گڑیا دے بیٹھی، ویڈیو وائرل

باکو میں کوپ 29 کلائمیٹ ایکشن سمٹ کے موقع پر ایک نوجوان لڑکی کی وزیراعظم شہباز شریف کو گڑیا پیش کرنے کی ویڈیو سوشل میڈیا پر وائرل ہوگئی۔

جب وزیر اعظم شہباز شریف سمٹ میں سرکاری عہدیداروں کے ساتھ چہل قدمی کر رہے تھے تو لڑکی نے ان کا پیچھا کیا اور سیلفی لینے کی گزارش کی۔

ایسے میں لڑکی نے وزیراعظم کو گڑیا تھما دی  جسے شہباز شریف نے مسکرا کر قبول کرتے ہوئے اس کے ساتھ تصویر کے لئے پوز دیا۔

اقوام متحدہ کا کلائمیٹ ایکشن سمٹ آذربائیجان کے شہر باکو میں شروع ہوا جو 22 نومبر تک جاری رہے گا۔ 197 ممالک اور یورپی یونین کے نمائندے کوپ 29 میں شرکت کررہے ہیں۔

وزیر اعظم شہباز شریف نے بدھ کے روز کانفرنس میں شرکت کی، جہاں انہوں نے موسمیاتی تبدیلی پر فوری اقدامات کی ضرورت پر زور دیا۔

کچھ لمحات بہت ہی خوبصورت نقوش چھوڑتے ہیں؛ جیسے وزیراعظم شہبازشریف سے بچی کا ملنا، ڈول کا گفٹ اور سیلفی لینا؛ وزیراعظم صاحب کی مسکراہٹ کتنی اپنائیت بھری اور خوبصورت لگ رہی ہے💕 pic.twitter.com/Lqg88WL8hU

— ندیّا اطہر (@naddiyyaathar) November 13, 2024

کوپ 29 سمٹ سے خطاب میں شہباز شریف نے کہا کہ کوپ 27، 28 اور ایک دہائی قبل پیرس معاہدے میں کیے گئے وعدوں پر اب عمل درآمد ہونا چاہیے۔

انہوں نے موسمیاتی تبدیلی سے نمٹنے کے لئے پاکستان کی کوششوں کو سراہا اور بین الاقوامی برادری پر زور دیا کہ وہ پاکستان جیسے ترقی پذیر ممالک کے ماحولیاتی اقدامات میں ان کی حمایت کرے۔