ہرنائی میں دھماکا، 11 مزدور جاں بحق اور متعدد زخمی

بلوچستان کے ضلع ہرنائی کے علاقے شاہرگ میں دھماکے سے 11 مزدور جاں بحق جب کہ متعدد کان کن زخمی ہو گئے۔

پولیس کے مطابق ہرنائی کے علاقے شاہرگ میں کوئلے کی کان میں کام کرنے والے مزدروں کی گاڑی کے قریب دھماکا ہوا جس کے نتیجے میں متعدد افراد زخمی ہوئے۔

دھماکے میں زخمی ہونے والے متعدد زخمیوں کی حالت تشویشناک ہے، قانون نافذ کرنے والے ادارے کے اہلکار بھی موقع پر پہنچ گئے اور دھماکے کی جگہ کو تحویل میں لیکر شواہد اکٹھے کرنا شروع کر دیے۔

ڈپٹی کمشنر  ہرنائی کے مطابق شاہرگ کے علاقے میں دھماکے سے 9 مزدور  جاں بحق  اور  8 زخمی ہوئے، زخمیوں کو فوری طور پر قریبی اسپتال منتقل کیا گیا جہاں زخموں کی تاب نہ لاتے ہوئے مزید دو مزدور دم توڑ گئے۔

شاہرگ دھماکے میں جاں بحق اور  زخمی ہونے والے زیادہ تر مزدوروں کا تعلق شانگلہ کے گاؤں پورن سے ہے۔

ترجمان حکومت بلوچستان نے شاہرگ دھماکے کی مذمت کرتے ہوئے کہا کہ دھماکے کے زخمیوں کا شاہرگ اسپتال میں علاج جاری ہے۔

صوبائی حکومت کے ترجمان نے بےتایا کہ شاہرگ میں دھماکے کی تحقیقات کا حکم دیا گیا جب کہ ابتدائی تحقیقات سے پتہ چلا ہے کہ سڑک کنارے دھماکا خیز مواد نصب کیا گیا تھا۔