عہدے کی بات نہیں کرتا، ملکی بہتری کیلئے کام کریں گے، شاہد خاقان عباسی

سابق وزیر اعظم شاہد خاقان عباسی کا کہنا ہے کہ عہدے کی بات نہیں کرتا، ملکی بہتری کیلئے کام کریں گے۔

 سابق وزیر اعظم شاہد خاقان عباسی پروگرام جی فارغریدہ میں شرکت کی جہاں میزبان نے سوال کیا کہ کیا اپوزیشن کی تمام جماعتیں رمضان کے بعد پی ٹی آئی کے ساتھ سڑکوں پر متحرک ہوں گی؟

سوال کے جواب میں شاہد خاقان عباسی کا کہنا تھا کہ ابھی تو اپوزیشن ایک سوچ کے ساتھ بیٹھی ہے، گرینڈ الائنس بنے گا تو پھر بات ہوگی، عہدے کی بات نہیں کرتا، ملکی بہتری کیلئے کام کریں گے۔

انہوں نے کہا کہ پی ٹی آئی نے غلطیاں کی ہیں ان کو سیکھنا چاہیے، مجھے پی ٹی آئی سے کوئی شکوہ نہیں ہے، اس وقت حکومت اور اپوزیشن کچھ کام نہیں کررہی، آئین و قانون پر پاکستانیوں کو اتفاق کرنا پڑے گا، ملک کے مسائل کے حل کیلئے سیاسی نا اتفاقی ختم کرنا ہوگی۔

شاہد خاقان عباسی نے کہا کہ ملک کے مسائل اور ان کے حل کی بات کرتا ہوں، گرینڈ ڈائیلاگ نہیں ایک ایجنڈے کی بات کررہے ہیں، رات  کے اندھیرے میں آئین میں ترامیم ملک کے مفاد میں نہیں۔

سابق وزیر اعظم شاہد خاقان عباسی نے کہا کہ ہمارے ملک کا بنیادی مسئلہ الیکشن کی چوری ہے، جس ملک میں سیاسی انتشار ہوگا وہاں معیشت نہیں بڑھے گی۔