اپوزیشن جماعتوں کا حکومت مخالف اتحاد کو وسعت دینے کا فیصلہ

حکومت اور پی ٹی آئی کے درمیان تعطل کا شکار مذاکرات کے درمیان حزب اختلاف کی جماعتوں نے اپنے حکومت مخالف اتحاد کو مضبوط کرنے کا فیصلہ کیا ہے کیونکہ وہ اہم ملاقاتوں اور تبادلہ خیال کے ذریعے ہم خیال جماعتوں کے ساتھ بھی بات چیت کرنے کا ارادہ رکھتے ہیں۔

رابطہ مہم کے تحت اتحاد کو وسعت دینے کے لیے اپوزیشن قیادت سندھ کا دورہ کرے گی اور وہاں تین روزہ قیام کے دوران وہ حیدرآباد میں پیر پگارا کے ساتھ ساتھ گرینڈ ڈیموکریٹک الائنس اور ایاز پلیجو سمیت ہم خیال جماعتوں کے رہنماؤں سے ملاقاتیں کرے گی۔

یہ انکشاف بانی پی ٹی آئی کی جانب سے عید کے بعد احتجاج کے لیے دیگر اپوزیشن جماعتوں سے رابطے تیز کرنے کی ہدایت کے چند روز بعد سامنے آیا ہے۔

سابق حکمران جماعت کی حکمت عملی کا اعلان بانی پی ٹی آئی کے وکیل فیصل چوہدری نے کیا، جنہوں نے کہا کہ پی ٹی آئی ایک عظیم اپوزیشن اتحاد بنانے کے لئے کام کر رہی ہے، جس میں آئین اور جمہوریت کی بحالی سمیت کچھ مقاصد پر توجہ مرکوز ہے۔

فیصل چوہدری کے مطابق سابق وزیراعظم نے اسد قیصر کو حکم دیا کہ وہ جمعیت علمائے اسلام (ف)، محمود خان اچکزئی کی پختونخوا ملی عوامی پارٹی ، شاہد خاقان عباسی کی عوام پاکستان، گرینڈ ڈیموکریٹک الائنس (جی ڈی اے)، جماعت اسلامی (جے آئی)، مہرنگ بلوچ اور دیگر سمیت تمام اپوزیشن جماعتوں سے رابطہ کریں۔

اپوزیشن وفد میں پی ٹی آئی کے سیکرٹری جنرل سلمان اکرم راجہ، محمود خان اچکزئی، اسد قیصر، صاحبزادہ حامد رضا، اخونزادہ حسین، بلوچستان نیشنل پارٹی مینگل (بی این پی-ایم) اور مجلس وحدت مسلمین (ایم ڈبلیو ایم) کے رہنما شامل ہوں گے۔

اپوزیشن اتحاد تاجر برادری، بار ایسوسی ایشن، پی ٹی آئی کراچی کے عہدیداروں اور صحافیوں سے بھی ملاقات کرے گا۔

دوسری جانب سابق وزیراعظم اور عوام پاکستان پارٹی کے کنوینر شاہد خاقان عباسی نے محمود خان اچکزئی کے ہمراہ صحافیوں کو بتایا کہ اپوزیشن جماعتوں کے ساتھ مشاورت جاری ہے کیونکہ لوگ ملک کی موجودہ صورتحال کا حل چاہتے ہیں۔

انہوں نے کہا کہ محمود خان اچکزئی نے 26 اور 27 فروری کو ہونے والی قومی کانفرنس کے حوالے سے مجھ سے مشاورت کی، ہم نے ملک کے مسائل کے حل کے لئے مجوزہ اجلاس منعقد کرنے پر اتفاق کیا ہے۔