محکمہ موسمیات نے عوام کیلئے خطرے کی گھنٹی بجادی

ملک بھر میں سردی کی شدت بڑھ گئی ہے اور دھند نے مختلف علاقوں میں ڈیرے ڈال لیے ہیں۔

 بڑے شہروں سمیت میدانی علاقوں میں روزمرہ معمولات متاثر ہو رہے ہیں۔ سڑکوں پر حدِ نگاہ کم ہے۔ فضائی آلودگی نے صورتحال کو مزید مشکل بنا دیا ہے۔ محکمہ موسمیات کے مطابق آئندہ چند دن بھی موسم سرد اور خشک رہنے کا امکان ہے۔ کئی علاقوں میں دھند برقرار رہ سکتی ہے۔

لاہور اس وقت شدید دھند کی لپیٹ میں ہے۔ صبح کے اوقات میں کئی مقامات پر نظر آنا مشکل ہو گیا۔ یخ بستہ ہواؤں کے باعث سردی میں اضافہ ہوا ہے۔ محکمہ موسمیات کے مطابق شہر کا درجہ حرارت 6 ڈگری سینٹی گریڈ ریکارڈ کیا گیا ہے۔ ہوا میں نمی کا تناسب 91 فیصد ہے۔ ہوائیں ہلکی رفتار سے چل رہی ہیں۔ آج بارش کا کوئی امکان نہیں۔

 ماہرین کا کہنا ہے کہ دن کے وقت سورج اور بادل نظر آ سکتے ہیں، مگر دھند چھٹنے کے آثار کم ہیں۔ فضائی آلودگی کے لحاظ سے لاہور کا ایئر کوالٹی انڈیکس 186 ریکارڈ ہوا ہے جو صحت کے لیے نقصان دہ سمجھا جاتا ہے۔

کراچی میں بھی سردی کی لہر برقرار ہے۔ رات کے وقت درجہ حرارت 10 ڈگری تک گر گیا جبکہ صبح کے اوقات میں 12 ڈگری ریکارڈ کیا گیا۔ محکمہ موسمیات کا کہنا ہے کہ شہر میں آئندہ دنوں میں بھی موسم سرد اور خشک رہے گا۔ کراچی کا فضائی معیار بدستور خراب ہے۔

ایئر کوالٹی انڈیکس کے مطابق کراچی دنیا کے آلودہ شہروں میں پانچویں نمبر پر ہے۔ فضا میں مضر ذرات کی مقدار 195 تک پہنچ چکی ہے جو صحت کے لیے خطرناک ہے۔

اسلام آباد میں موسم خاصا سرد ہو گیا ہے۔ کم سے کم درجہ حرارت 3 ڈگری سینٹی گریڈ ریکارڈ کیا گیا ہے۔ دن کے وقت زیادہ سے زیادہ درجہ حرارت 16 ڈگری تک رہنے کا امکان ہے۔ شہر میں دن بھر ٹھنڈی ہوائیں چلتی رہیں گی۔ اس سے سردی کی شدت مزید بڑھ سکتی ہے۔

پنجاب کے بیشتر اضلاع میں موسم سرد اور خشک رہنے کی پیش گوئی کی گئی ہے۔ مری اور گلیات میں شدید سردی کا امکان ہے۔ سیالکوٹ، نارووال، راولپنڈی، اٹک، جہلم، گوجرانوالہ، لاہور، فیصل آباد، ساہیوال، ملتان، بہاولپور اور رحیم یار خان میں دھند چھانے کی توقع ہے۔ پوٹھوہار کے علاقوں میں صبح کے وقت کہرا پڑ سکتا ہے۔

خیبرپختونخوا کے بیشتر اضلاع میں بھی سردی کا راج رہے گا۔ میدانی علاقوں میں موسم سرد اور خشک جبکہ پہاڑی علاقوں میں شدید سردی متوقع ہے۔ پشاور، مردان، نوشہرہ، چارسدہ، صوابی، بنوں، کرک، لکی مروت اور ڈی آئی خان میں صبح اور رات کے وقت دھند پڑنے کا امکان ظاہر کیا گیا ہے۔

بلوچستان کے زیادہ تر علاقوں میں موسم سرد اور خشک رہنے کی پیش گوئی ہے۔ شمالی اضلاع میں سردی کی شدت زیادہ ہو سکتی ہے۔ ڈیرہ بگٹی، کوہلو، سبی اور گردونواح میں صبح کے وقت دھند چھانے کا امکان ہے۔ کشمیر اور گلگت بلتستان میں بھی موسم شدید سرد اور خشک رہنے کی توقع ہے۔

واضح رہے کہ شدید سردی کے باعث حکومت نے تعلیمی اداروں کی تعطیلات میں توسیع کر دی ہے۔ جاری نوٹیفکیشن کے مطابق اسکول، کالجز اور دیگر تعلیمی ادارے اب 12 جنوری کے بجائے 19 جنوری 2026 کو کھلیں گے۔