سرکاری ملازمین کیلئے انتہائی اہم خبر آگئی

وزیراعظم شہباز شریف نے سرکاری افسران کی کارکردگی جانچنے کے نظام کو مؤثر بنانے کی ہدایت جاری کر دی ہے۔ اس مقصد کے لیے سفارشات جلد تیار کرنے پر زور دیا گیا ہے تاکہ سرکاری نظام میں بہتری لائی جا سکے۔

وزیراعظم کی زیر صدارت سول سروس اصلاحات اور وزارتوں میں کارکردگی جانچ کے نظام سے متعلق اجلاس منعقد ہوا۔ اجلاس میں مختلف تجاویز پر غور کیا گیا اور اب تک ہونے والی پیش رفت کا جائزہ لیا گیا۔

وزیراعظم نے کہا کہ وفاقی سیکرٹریز اور دیگر افسران کی کارکردگی جانچنے کے لیے ایک جامع نظام ہونا چاہیے۔ اسی نظام کی بنیاد پر ترقی، مالی مراعات اور دیگر سہولیات دی جائیں۔ ان کا کہنا تھا کہ شفاف اور واضح معیار کے بغیر اچھی حکمرانی ممکن نہیں۔

شہباز شریف نے اس بات پر بھی زور دیا کہ بہتر کارکردگی دکھانے والے افسران کی حوصلہ افزائی ضروری ہے۔ ایسے افسران کی تعریف اور انعامات سے اداروں کی مجموعی کارکردگی بہتر ہو سکتی ہے۔ انہوں نے کہا کہ اصلاحات کو عالمی معیار کے مطابق بنایا جائے تاکہ عوام کو بہتر خدمات مل سکیں۔

اجلاس میں سول سروس اصلاحات پر قائم کمیٹی نے اپنی رپورٹ پیش کی۔ مختلف وزارتوں اور صوبوں کے اعلیٰ حکام نے بھی اجلاس میں شرکت کی اور اپنی آرا سے آگاہ کیا۔ وزیراعظم نے ہدایت دی کہ مشاورت کے عمل کو مزید تیز کیا جائے تاکہ عملی اقدامات جلد شروع ہو سکیں۔